Jótelip, ystyǵy kóterilgender nege uzaq ýaqyt jazyla almaı jatyr - mınıstr jaýaby
ASTANA. KAZINFORM – Densaýlyq saqtaý mınıstri Aqmaral Álnazarova jótel juqtyrǵan qazaqstandyqtardyń nege uzaq ýaqyt boıy jazyla almaı jatqanyn túsindirdi.
«Halyq arasynda dene qyzýynyń 39 gradýstan túspeı, 2 aptadan 3 aıǵa deıin jótel ketpeıtin aýrýdyń tarap jatqany týraly shaǵymdar bar. Buryn 4-5 kúnde ketip qalatyn sımptomdardyń uzaqqa sozylyp ketýine ne sebep?» - dep surady jýrnalıst Úkimet otyrysynan keıin ótip jatqan baspasóz máslıhatynda.
Aqmaral Álnazarova onyń bir sebebi halyqtyń dári-dármekti beıbereket paıdalanýynda bolýy múmkin degen boljam aıtty.
«Bul jerde keshendi máseleler bar dep oılaımyn. Úlken máseleniń biri – vırýstardyń antıbıotıkterge tózimdiligi. Búkil álemde osyndaı másele bar. Ókinishke qaraı, antıbıotıkterdi baqylaýsyz paıdalaný máselesi búkil álemde ózekti bolyp tur. Qazir jas balalardyń aýyr jaǵdaımen aýrýhanaǵa túsip, eshqandaı antıbıotıkpen, 4-5 besinshi qatardaǵy antıbıotıktermen emdelmeı jatqanyn kórip otyrmyz», - dedi mınıstr.
Sondaı-aq, ol jastardyń durys tamaqtanbaýy densaýlyǵynan kórinis berip jatqanyn aıtady.
«Ekinshi másele – qansha degenmen, durys tamaqtaný máselesi shyǵar. Qazir, ókinishke qaraı, ásirese jastar jaǵy sonsha bir sapaly tamaq iship júrgen joq. Bul da biziń ımmýnıtetimizdi qalyptastyrady. Uzaq ýaqyt boıy aýrýdyń taǵy bir sebebi osynda bolýy da múmkin. Úshinshi másele qaladaǵy kólikterdi sany bolýy múmkin. Allergııalyq rınıtter men sınýsıtter de ásirese qala halqynyń densaýlyǵyna áser etip jatýy múmkin. Sondyqtan bul máseleni keshendi túrde qaraý kerek», - dedi Densaýlyq saqtaý mınıstri.
