Jótelip, dene qyzýy kóterilgende úıde emdelý qaýipti - epıdemıolog dáriger
AQTÓBE. QazAqparat – Aqtóbe oblysy boıynsha qazir 112 adam koronavırýs ınfektsııasynan em qabyldap jatyr. Oblystyq sanıtarlyq-epıdemıologııalyq baqylaý departamenti basshysynyń orynbasary Muhtar Serbaevtyń aıtýynsha, naýqastardyń úıden emdelýi olardy pnevmonııaǵa dýshar etken. Bul týraly óńirlik kommýnıkatsııalar qyzmetinde ótken baspasóz máslıhatynda aıtyldy, dep habarlaıdy QazAqparat tilshisi.
Aqtóbe oblysy áli de «jasyl» aımaqta. Ótken táýlikte óńirde 6 adamnan koronavırýs ınfektsııasy anyqtaldy. Vırýs juqtyrǵandardyń tórteýi Aqtóbe qalasynyń turǵyny bolsa, ózgesi Mártók aýdanynyń Jaısań shekara beketinde tirkeldi. Eki adam da Reseıden kelgen elimizdiń ońtústik óńiriniń týmasy.
«Aqtóbe oblysy boıynsha koronavırýs ınfektsııasynyń 12oshaǵy bar. Negizi sońǵy eki aptada óńirde indetke shaldyqqandar sany azaıyp keledi. Bul jaqsy kórsetkish. Alaıda adamdar jótelip, dene qyzýy kóterilgen kezde ózderi dári alyp, ózderi em júrgizedi. Sóıtip pnevmonııaǵa shaldyǵyp jatyr. Bul durys emes. Birden ýchaskelik dárigerge habarlasyp, shuǵyl bolsa jedel járdem shaqyrǵan jón», - dedi Aqtóbe oblystyq sanıtarlyq-epıdemıologııalyq baqylaý departamenti basshysynyń orynbasary Muhtar Serbaev.
Qazir Aqtóbe oblysy boınysha koronavırýs ınfektsııasyna shaldyqqan 112 adam dárigerlerdiń baqylaýynda. Olardyń 27-i ınfektsııalyq aýrýhanada em qabyldap jatyr.
«Oblysta 48 naýqas pnevmonııadan em qabyldap jatyr. Onyń 38-i Aqtóbe qalasynda. Barlyǵy 9 naýqas jansaqtaý bóliminde bolsa, onyń bireýi ókpeni jasandy jeldetý apparatyna qosylǵan. Qazirgi kezde oblys boıynsha úsh karantındik statsıonar bar. Onda 47 adam jatyr», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
Aıta keteıik, Aqtóbe oblysy boıynsha 5 PTR zerthana bar. Onda 230 myńnan astam synama alyndy.
