Josparly medıtsınalyq kómek kórsetýden bas tartqan mekemelerge shara qoldanamyz – Marat Shoranov
NUR-SULTAN. QazAqparat – Densaýlyq saqtaý vıtse-mınıstri Marat Shoranov eldegi epıdemıologııalyq jaǵdaıdy jeleý etip, josparly medıtsınalyq kómek kórsetýden bas tartqan mekemelerge tıisti shara qoldanylatynyn aıtty, dep habarlaıdy QazAqparat tilshisi.
«2020 jylmen salystyrǵanda josparly medıtsınalyq kómek kórsetý jaǵdaıy aıtarlyqtaı qalypqa túsip qaldy. Alǵashqy býynda medıtsınalyq qyzmet kórsetetin jeke menshiktegi de, memlekettik emhanalar da halyqpen tolyq kólemde jumys istep jatyr. Iá, keıbir medıtsınalyq qyzmet usynýshylar kadr máselesine tap kelip jatyr. Ózderińiz bilesizder, kúshtiń kóbi koronavırýs ınfektsııasymen kúreske jumsalǵan bolatyn. Biraq biz MÁMS qorymen birge óńirlerde bul máseeni baqylaýda ustap otyrmyz», - degen dárigerge jazylý kezegi boıynsha týyndaǵan máseleler jekelegen óńirlerge tán degen pikir aıtty.
«Eger adam dárigerdiń qabyldaýyna jazylar kezde máselege tap bolsa, Densaýlyq saqtaý mınıstrliginiń baılanys ortalyǵyna 1406 nómiri boıynsha júgine alady. Bul nómirge túsken aqparat úsh deńgeıli óńdeýden ótip, MÁMS qoryna túsedi. Tıisinshe osy olqylyqqa jol bergen medıtsınalyq uıymdarǵa sanktsııalar salynýy múmkin. Bizdiń basty mindetimiz – emdelýshilerdiń quqyǵyn qorǵaý. Emdelýshiniń quqyǵyn qorǵaý normalaryn qoldana otyryp, MÁMS qory arqyly ondaı jaıttarǵa jaýap qatamyz. Jalpy aıtsaq, elimizde josparly medıtsınalyq kómek qalypty rejımde júrgizilip jatyr. Iá, áleýmettik qashyqty, adamdardyń ǵımarat ishinde shekten tys jınalýyn boldyrmaý sııaqty shekteýler bar. Bul kınıkalar ishindegi menedjmentke baılanysty. Taǵy da aıtam, qarapaıym terapevtke nemese jalpy praktıka dárigerdiń qabyldaýyna jazyla almaǵan jaǵdaı bolsa, 1406 telefony arqyly habarlańyzdar. Biz áreket etemiz», - dedi Marat Shoranov.
