Jospardan tys reıd: Ákimdik qyzmetkeri jýrnalıstermen birge dúken aralady

«Astana ákimdigi áleýmet úshin eń qajetti azyq-túlikke kún saıyn monıtorıng júrgizip turady. Monıtorıngtiń nátıjesine qarasaq, 21 taǵamnyń baǵasy qymbattaǵan»,-dedi A.Lýkın.

Ákim orynbasarynyń aıtýynsha, óndirýshiniń baǵasy artqan soń, qant baǵasy da qymbattaǵan. Negizgi qant óndirýshi - «TsASK» JShS baǵanyń ósýin qant shıkizatynyń bir tonnasy 354 dollar 477 dollarǵa jetýimen túsindirip otyr eken.

Qant baǵasyna qatysty materıal jasaý barysynda 18 shilde kúni qaladaǵy iri saýda oryndarynyń biri - «Smoll» saýda núktesinde oryn alǵan oqıǵany baıandadyq.

«Búgin  tańerteń Astana qalasynyń ákimi men Ulttyq ekonomıka mınıstri Astana qalasyndaǵy tórt bazardy aralap kórip, jaǵdaıdy qarastyryp, tıisti tapsyrma berdi. Qazir monopolııaǵa qarsy komıtet bul jumysty júrgizedi, materıaldaryńyzdy ruqsat bolsa, bizge berseńiz»,-dedi brıfıng barysynda Aýyl sharýashylyǵy basqarmasynyń basshysy Á.Qurmanǵalıev.

Onyń aıtýynsha, dál búgin bazardaǵy qant baǵasy 300-320 teńgeni qurap otyr eken. Degenmen, biz qala boıynsha qant baǵasy ósip qana qoımaı, ony tabýdyń ózi qıynǵa soǵyp ketkenin aıtyp, brıfıng aıaqtalǵan soń, qantty ádeıi tyǵý faktisi tirkelgen oryndarǵa birge barýdy usyndyq. Ákimniń orynbasary A.Lýkınniń tapsyrmasymen, brıfıngten keıin Áset Qurmanǵalıev jýrnalıstermen birge «Smoll» dúkenine attandy.

Dúken sóresinde áli qant joq eken. Ony ákimdiktiń ókili óz kózimen kórdi. Qanttyń «qaıda ketkenin» anyqtaý úshin dúkenniń qoımasyna qaraı bet aldyq.

Aıta keterligi, bunyń aldynda jýrnalısterge dóreki sóılegen dúken qyzmetkerleri  búgin aldymyzdan amandasyp shyqty.

«Qant joq. Bizdiń qoımada qant zapasy joq. Keıde qantty shyǵaryp úlgermeı jatamyz. Biz negizinde qantty satyp alyp jatyrmyz...» dep áńgimesin bastaı bergen dúken qyzmetkeri Gúljan Beksultanovany áriptesi toqtatty. Áńgimeni toqtatty da ózin tanystyrýdan úzildi-kesildi bas tartyp,  jýrnalısterdi ertip barǵan Áset Qurmanǵalıevpen jeke sóılesetinin aıtty. Astanaǵa qant jetkizetin kompanııa baǵasyn alty teńgege arzandatamyn dep ýáde etti.  Tipti, kabınettiń esigin ıterip turyp, ákimdik pen dúken arasynda jýrnalısterge «estip, kórýge, jazýǵa» bolmaıtyn áńgimeni jalǵastyrdy. Syrtta kúttik. Shyqqan soń aty-jónin aıtqysy kelmegen qyzmetker, «qantty kóterme baǵamen satyp alatyn saýdagerler alady da ony qaıta satady, soǵan jol bermeý úshin qant satylmaı jatyr», dedi. Onyń aıtýynsha, qant 252 teńgeden satylǵan. «Ótken senbiden beri bizde qant joq» degen oǵan biz dúısenbi kúngi jýrnalıster dúken qoımasynan qant «tapqanyn» aıtyp edik, «men dúısenbi kúni demaldym» dep jaýap berdi.

Bul áńgimeden keıin qalalyq ákimdiktiń aýyl sharýashylyǵy basqarmasyn basqaryp otyrǵan Áset Qurmanǵalıev «qazir Qazaqstan boıynsha shıkizat joq bolyp otyr. Ótken jyly da teńge qunsyzdanǵan kezde, qant joǵalyp ketken edi. Sodan keıin biz zertteý júrgizip, tıisti sharalardy qolǵa alǵan bolatynbyz. Qazir bul máseleni taǵy tekserý kerek»,-dedi.

Endi Monopolııaǵa qarsy komıtettiń tekserýin kútýge týra keledi.