Jospardan tys tekserý barysynda 200 medıtsınalyq uıymnyń jumysynan zańsyzdyq tabyldy

ASTANA. KAZINFORM – Áleýmettik medıtsınalyq saqtandyrý qory tóraǵasynyń orynbasary Indıra Sarkenova medıtsınalyq uıymdarǵa júrgizilgen tekserýlerdiń qorytyndysyn aıtty.

ÁMSQ Joǵary aýdıtorlyq palatanyń uıǵarymy jáne Densaýlyq saqtaý mınıstrliginiń tapsyrmasy boıynsha satyp alý rásimin bastamaı turyp medıtsınalyq uıymdarǵa jospardan tys tekserý júrgizgen. 

– 1 394 memlekettik jáne jeke menshik medıtsınalyq uıymnyń jumysy tekserildi. Solardyń ishinde 237 mekemeniń jumysynan birqatar zań buzý faktileri anyqtaldy. 75 medıtsınalyq uıymda medıtsınalyq kómek pen óndiristik baza lıtsenzııasy durys rásimdelmegen. 38 mekemede ruqsat qujattary bolmaǵan. Bir óndiristik bazaǵa birneshe medıtsınalyq uıym tirkeýdiń 48 jaǵdaıy belgili boldy, - dedi ol.

Taǵy 32 uıymda medıtsına qyzmetkerleriniń tıisti sertıfıkattary bolmaǵan.

- 119 medıtsınalyq uıymda qajetti tósektiń jetkiliksizdigi, medıtsınalyq tehnıkanyń aqparattyq júıelerde kórsetilgen sandarmen sáıkespeýi sııaqty kemshilikter tabyldy, - dedi Indıra Sarkenov Májiliste.

Anyqtalǵan zań buzý faktileri boıynsha turaqsyzdyq tólemi taǵaıyndalyp, aıyppuldar jazylǵan.

Sondaı-aq óreskel zańsyzdyqtarǵa jol bergen medıtsınalyq uıymdarmen kelisimsharttardy úzý máselesi qaralyp jatqany aıtyldy.

ÁMSQ ókili 2025 jyldan bastap medıtsınalyq uıymdardyń naýqas qabyldaý kórsetkishter jyl saıyn ózektendirilip otyratynyn atap ótti. Bul shara is júzinde kórsetilgen qyzmet pen qujattardaǵy kórsetkishterdiń bir-birine sáıkestigin tekserý úshin josparlanyp otyr.

Osyǵan deıin habarlaǵanymyzdaı, medsaqtandyrý qory saqtandyrýdyń toqtatylǵany týraly aldyn ala eskertpek