Jospardan tys tekseris: Jambyl oblysynda 133 emshara kabıneti men 91 nysan óz erkimen jumysyn toqtatty
TARAZ. KAZINFORM — Jospardan tys tekserýler barysynda Jambyl oblysynda jumys istep turǵan 133 emshara kabınetinen 91 nysan óz erkimen dárigerge deıingi medıtsınalyq qyzmetin toqtatty. Bul týraly QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti málimdedi.
Mundaı sheshim óńirdegi emshara kabınetteriniń qyzmetin jospardan tys tekserýdiń aralyq qorytyndysyna saı qabyldanyp otyr.
Alda QR Densaýlyq saqtaý mınıstrligi Jeke emshara kabınetterinde kórsetiletin medıtsınalyq qyzmetterdiń sapasy men qaýipsizdigin baqylaýdy kúsheıtpekshi.
Bıylǵy jyldyń basynan beri Jambyl oblysynda medıtsınalyq kómek kórsetý standarttaryn buzǵan medıtsınalyq uıymdarda eki adam qaıtys bolǵanyn esterińizge sala keteıik.
— QR DSM Medıtsınalyq jáne farmatsevtıkalyq baqylaý komıteti osy mekemelerdi tekserý kezinde eleýli quqyq buzýshylyqtardy, onyń ishinde shuǵyl medıtsınalyq kómek kórsetý úshin lıtsenzııalar men sharttardyń joqtyǵyn, dári-dármekterdi saqtaý qaǵıdalaryn saqtamaýdy anyqtady, — delingen habarlamada.
Vedomstvonyń dereginshe, óńirde qoǵamdyq monıtorıngtik toptar quryldy. Júrgizilgen tekserýlerden keıin olar medıtsınalyq kómek kórsetý standarttaryn buzatyn 133 emshara kabınetin anyqtady.
— Jospardan tys tekserýler barysynda oblystyń 133 jumys istep turǵan emshara kabınetinen 91 nysan óz erkimen dárigerge deıingi medıtsınalyq qyzmetin toqtatty, onyń ishinde 33-i medıtsınalyq lıtsenzııaǵa dárigerge deıingi kómek qosymshasyn tapsyrdy, 58-i ruqsat qujattarynsyz medıtsınalyq qyzmetpen aınalysty. 37 nysanda tekserý júrgizildi, 3 nysan jumys istep tur, Departament tekserýdi jalǵastyrýda jáne 2 nysanǵa tekserý júrgizý josparlanýda, — dep habarlady QR DSM Medıtsınalyq jáne farmatsevtıkalyq baqylaý komıteti.
Júrgizilgen tekserýlerdiń nátıjesi boıynsha 37 nysanǵa ákimshilik quqyq buzýshylyq týraly 46 hattama jasaldy, 10, 2 mln teńgege aıyppul salyndy.
Osyǵan uqsas jumys Qazaqstannyń basqa óńirlerinde de júrgiziletin bolady.
Jospardan tys tekserýler azamattardyń resmı ótinishteri, ákimdikterdiń, densaýlyq saqtaý basqarmalarynyń, quqyq qorǵaý organdary tapsyrmalarynyń negizinde ǵana júrgizilýi múmkin ekenin esketken jón.
Densaýlyq saqtaý mınıstrligi tek lıtsenzııalanǵan medıtsınalyq uıymdarǵa júginýdi, personaldyń biliktiligine jáne medıtsınalyq qyzmetti júzege asyrýǵa lıtsenzııanyń bolýyn surap-bilýi, dárigerlik baqylaýsyz úıde emsharalardy júrgizbeýdi usynady.
Aıta keteıik, búgin Qostanaı oblysynda náreste ólimi úshin bas dárigerlerge sógis jarııalandy.