Joshy han tarıhı-mádenı ortalyǵynyń qurylysyna «Eńbek» baǵdarlamasynyń jumysshylary tartylady

JEZQAZǴAN. QazAqparat - Qazaqstan Respýblıkasy Premer-mınıstriniń orynbasary Eraly Toǵjanov bastaǵan úkimettik delegatsııa jumys saparymen Jezqazǵanǵa keldi. Ol «Jumyspen qamtý jol kartasy» baǵdarlamasy boıynsha jumys barysymen tanysyp, óńirdiń ózekti máseleleri men olardy sheshý joldaryna nazar aýdardy, dep hzabarlaıdy QazAqparat oblys ákimdigine silteme jasap.

Mańyzdy máselelerdiń biri - Jezqazǵan qalasyndaǵy apatty úılerdegi turǵyndardy kóshirý. Eraly Toǵjanov jumys sapary barysynda osy máselege nazar aýdardy.

- Oblys ákimine bul máseleni baqylaýǵa alýdy jáne kelesi jyldyń sońyna deıin ony sheshýdi tapsyramyn, - dedi Eraly Toǵjanov Qaraǵandy oblysynyń basshysyna.

- Oblysta barlyǵy 54 úı apatty dep tanyldy, onyń 26-y osynda. Bıyl qalalyq bıýdjetten aqsha bólindi. Máseleni sheship jatyrmyz, - dep sendirdi Qaraǵandy oblysynyń ákimi Jeńis Qasymbek.

Jezqazǵan men Sátbaev qalalarynda halyqqa úzdiksiz sý berý máselesi de ózekti bolyp tur. Jezqazǵan jurtshylyǵy Eraly Toǵjanovqa osy máselemen júgindi.

- Qaraǵandy oblysynyń ákimimen bul máseleni talqyladyq. Ony sheshý joldaryn qarastyramyz, - dedi Eraly Toǵjanov.

- Biz Keńgirden shyǵatyn rezervtik sý tartqyshty salýdamyz. Ol eki aı aralyǵynda iske qosylady. Sondaı-aq Esqula sýaǵaryn salý jobasyn iske asyrýǵa kirisemiz. Nátıjesinde, 15% sý Jezqazǵanǵa Esqula sý qubyrynan, 55-60%-y Úıtas-Aıdos sý taratqyshynan jáne qalǵany Keńgirden tartylady, - dedi Jeńis Qasymbek.

Jezqazǵanda jalpy somasy 3,9 mlrdteńge bolatyn 36 ınfraqurylymdyq joba júzege asyrylýda. Sondaı-aq, qalada 58 kópqabatty turǵyn úıdiń qasbeti men shatyryn, 1,5 shaqyrym káriz jáne sý qubyry jelilerin, 34 shaqyrym joldy jóndeý josparlanyp otyr. Sonymen qatar, eki saıabaq abattandyrylady, 800-den astam jaryqtandyrý baǵany ornatylady.

Jumyspen qamtýdyń jol kartasy boıynsha myńnan astam jumys orny ashylady, 600-ge jýyq adam jumyspen qamtý ortalyǵy arqyly jumysqa ornalasady.

Jumys sapary barysynda Eraly Toǵjanov 900 oryndyq mektepti aralap kórdi. Barlyq jumystar kestege sáıkes júrgizilýde. Qazirgi ýaqytta nysan aıaqtalýǵa jaqyn. Aýlanyń aýmaǵyn abattandyrý, kógaldandyrý, jıhaz jáne qural-jabdyqtar alý qaldy.

Ulytaý aýdanyndaǵy Joshy han tarıhı-mádenı ortalyǵynyń qurylys alańy da Premer-mınıstr orynbasarynyń nazarynan tys qalǵan joq. Jóndeý jáne qurylys úshin «Eńbek» memlekettik baǵdarlamasyna qatysatyn jumysshylar tartylady.

Sondaı-aq, qazir Joshy han men Alasha han kesenelerinde qalpyna keltirý jumystary júrip jatyr.

- Kesenelerdi qalpyna keltirý kezinde birinshi kezekte tarıhı qundylyqty saqtaý qajet. Prezıdent osy kesenelerdi qalpyna keltirýdi baqylaýǵa aldy. Barlyǵyn sapaly jasaý mańyzdy. 2020 jyly bul mańyzdy oqıǵalardyń biri bolmaq, - dedi Eraly Toǵjanov.

Ulytaý aýdanynda Jumyspen qamtýdyń jol kartasy aıasynda 18 ınfraqurylymdyq jobany júzege asyrý josparlanýda. Bul Qarsaqpaı jáne Jezdi aýyldaryndaǵy sporttyq - saýyqtyrý keshenderiniń, Ulytaý kentindegi tazartý nysanynyń qurylysy, sondaı-aq bilim berý salasynda úsh joba, mádenıet salasynda tórt joba jáne TKSh-nyń segiz jobasy. 522 jumys orny qurylady, onyń ishinde 263 adam jumyspen qamtý ortalyǵy arqyly jumysqa ornalasady.