«Joshy ulysy: tarıhy, murasy jáne taǵlymy»: Almatyda tarıhshylar bas qosty
ALMATY. KAZINFORM – Abaı atyndaǵy Qazaq ulttyq pedagogıkalyq ýnıversıtetinde Joshy ulysynyń 800 jyldyǵyna arnalǵan «Joshy ulysy: tarıhy, murasy jáne taǵlymy» atty halyqaralyq ǵylymı-praktıkalyq konferentsııa ótti.
Halyqaralyq ǵylymı-tájirıbelik konferentsııa jumysyna Qazaqstannyń jáne sheteldiń belgili ǵalymdary, Almaty men basqa da respýblıkalyq JOO oqytýshylary qatysyp, atalǵan másele boıynsha óz kózqarastary men oılaryn ortaǵa saldy. Sheteldik baıandamashylar qatarynda Djıý-ıÝp Lı (Kanada), Hıroıýkı Nagamıne (Japonııa), Nurlan Kenjeahmet (Germanııa), Abdýllah Gıýndogdý (Túrkııa) boldy.
– «Joshy ulysy: tarıhy, murasy jáne taǵlymy» atty halyqaralyq ǵylymı konferentsııaǵa qosh keldińizder. Búgingi jıyn álemge Altyn Orda atymen tanymal bolǵan HІІІ ǵasyrdaǵy Shyńǵys han ımperııasynyń 4 bólinisiniń ishindegi eń uzaq ómir súrgen memleket – Joshy ulysyna arnalyp otyr. Ol – Altaı taýlarynan Dýnaı ózenine deıingi jerlerdi alyp jatqan tili, dini, turmysy, mádenıeti bólek ondaǵan halyqtardy biriktirgen alyp ımperııa, erekshe órkenıet. Joshy ulysy ómir súrgen dáýir – qazaq jerindegi memlekettilik dástúrdiń damýyndaǵy mańyzdy kezeńderdiń biri. Memleket basshysy Qasym-Jomart Toqaevtyń Ulttyq quryltaıdyń úshinshi otyrysynda aıtqan sózi de bul oıymyzdy qýattaı túsedi, - dedi Abaı atyndaǵy QazUPÝ Basqarma múshesi - zertteý qyzmeti jónindegi prorektory Ertaı Sultan.
Konferentsııa barysynda Joshy ulysynyń tarıhnamasy men derekkózderi, tarıhı geografııasy, irgeles kórshi memlekettermen dıplomatııalyq baılanystary, Eýrazııadaǵy halyqaralyq qatynastardaǵy Altyn Orda handarynyń róli jáne ózge de taqyryptar talqylandy.
