Joshy han týraly jazylǵan tuńǵysh tarıhı romannyń tanystyrylymy ótedi
ASTANA. KAZINFORM - 20 sáýir kúni saǵat 11.00-de Astanadaǵy kitap kórmesi aıasynda aqyn, jazýshy Ularbek Dáleıulynyń «Joshy han» tarıhı romanynyń tanystyrylymy ótedi.
Aıta keteıik, bul shyǵarma - qazaq jáne álem ádebıetinde Joshy han jaıly jazylǵan tuńǵysh roman. Avtor tórt jylǵa sozylǵan zertteý eńbekteriniń negizinde Shyńǵys zamany men onyń tuńǵysh uly Joshy han jaıly tereń jáne tyń derekterdiń izine túsken. Sol arqyly Joshynyń qym-qıǵash kúnderde ǵumyr esigin ashýy, ósken ortasy men jastyq shaǵy, joryqtary men ómiriniń sońyna deıingi oqıǵalar barynsha tolyq baıandaǵan.
Sonymen qatar, jazýshy dáıekti zertteýlerine súıene otyryp, dáýirler kóshin, qym-qýyt joryq izderin qazaqy kórkem tilmen tógilte jazǵan. Avtor buryn beımálim bolǵan tarıhı derekterdi arshyp, osyǵan deıingi qalyptasqan taptaýryn tujyrymdardy talqandap, tyń kózqaraspen usynady.
«Romannyń qundylyǵy sol dáýirge qatysty jazylǵan, eń senimdi degen derek kózderin paıdalana otyryp, oqıǵalar órisin shynaıy faktilermen túıindeýge tyrystyq. Tańǵut, shúrshit soǵystary, ǵalam tarıhynda eleýli orny bar Horezm joryqtary jyl-aıy, shaıqas oryndary, adam attary sol qalpymen kórkem tilde hatqa tústi. Joshy han 1221 jyly Úrgenish túbindegi aýyr shaıqastan keıin Horezm joryǵynan qaıtyp, Ulytaýǵa kelip irge tebedi. 1223 jyly «Qulanbasyda» ótken quryltaıdan soń, Shyńǵys qaǵannyń arnaıy jarlyǵymen Deshti-Qypshaq dalasynda «Joshy ulysyn» qurady. Búgingi Qazaq Eli sol «Joshy ulysynyń» jerinde, Altyn Ordanyń qara shańyraǵyn ustap otyr», - deıdi jazýshy Ularbek Dáleıuly romannyń ereksheligi týraly.
