Joshy han týraly halyqaralyq tarıhı serıaldyń túsirilimi bastaldy
ASTANA. KAZINFORM - Sháken Aımanov atyndaǵy «Qazaqfılm» stýdııasynyń pavılondarynda «The Golden Empire» degen shartty ataýymen belgili halyqaralyq tarıhı serıal túsirile bastady.

«Dara» Prezıdenttik bastamalar qorynyń qoldaýymen júzege asyrylyp jatqan bul joba tarıhı naqtylyq pen dramalyq baıandaý úılesim tapqan aýqymdy mádenı oqıǵa bolmaq.

Aǵylshyn tilindegi derekti-kórkem telehıkaıanyń óndirisin Karga Seven Pictures júzege asyrýda. Bul kompanııa 90-nan astam elde Netflix-tiń TOP-10 tizimine engen «Osman ımperııasynyń órleýi» jáne «Ósıet: Musanyń tarıhy» sııaqty jobalarymen tanymal. TAURUS Asia Production – jobanyń jergilikti seriktesi.
Tańǵy 6:00-de túsirilim alańy jandana bastady. Alǵashqy kadrdy túsirmes buryn, rejısser Emre Sahın, túrik prodıýseri Fıkret Manoǵlý jáne TAURUS Asia Production prodıýseri Anna Chakırtova túsirilim tobyna motıvatsııalyq jáne quttyqtaý sózderin joldady.

«Bul - jaı ǵana serıal emes, bul ótkenmen qurylǵan dıalog. Árqaısyńyz osy tarıhty búginge jetkizýshisiz. Ár qadam – ujymdyq eńbektiń nátıjesi. Stsenarııden bastap kostıýmder men dekoratsııaǵa, jaryq qoıýdan operatorlyq jumysqa deıingi árbir kezeń – alǵa jyljýdyń mańyzdy bóligi. Biz birge jumys isteımiz, bir-birimizge qoldaý kórsetemiz jáne bul jobanyń erekshe bolatynyna senemiz», – dedi Emre Sahın.
9:10-da jobaǵa arnaıy jasalǵan 12 metrlik kıiz úıde alǵashqy kadr taspaǵa túsirildi. Al túske deıin alǵashqy dýbl sátti shyǵyp bekitilgen soń, túsirilim toby dástúrge sáıkes qoltańbalar qoıylǵan tabaqty syndyryp, qatysýshylar estelikke synyqtan ala ketti.

- Qazirgi tańda túsirilim toby joǵary daıyndyq deńgeıin jáne yntasyn kórsetip, belgilengen kestege saı qarqyndy jumys isteýde. «The Golden Empire» serıaly Qazaqstan kınoındýstrııasynyń damýyna eleýli úles qosyp, halyqaralyq kınematografııalyq yntymaqtastyqty nyǵaıtýǵa yqpal etedi, - delingen «Dara» Prezıdenttik bastamalar qorynyń baspasóz qyzmeti taraqtan aqparatta.
Osyǵan deıin Ulttyq kıno ortalyǵy bıyl 10 jańa fılmniń prokatqa shyǵatyny týraly habarlaǵanyn jazǵan edik.