Josaly kentin aýyzsýmen qamtamasyz etý -kúrdeli máselesi bolyp otyr - Májilis depýtaty Qylyshbaı Bısenov
ASTANA. Jeltoqsannyń 24-i. QazAqparat - QR Parlamenti Májilisiniń depýtaty Qylyshbaı Bısenov QR Premer-Mınıstri Kárim Másimovke saýal joldap, Qyzylorda oblysynyń Qarmaqshy aýdany, Josaly kenti turǵyndaryn aýyzsýmen qamtamasyz etý jónindegi kúrdeli máseleni kóterdi,
dep habarlaıdy QazAqparat.
Depýtattyń aıtýynsha, «Aral» respýblıkalyq memlekettik kásiporynnyń «Oktıabr toptyq sý qubyry» fılıaly 22 myń 500 turǵyny bar Josaly kenti men onyń aınalasyndaǵy 4 aýyldyq okrýgtiń halqyn aýyzsýmen qamtamasyz etip keledi. «Taza sý» baǵdarlamasy aıasynda sýmen jabdyqtaý júıesi jańadan salynyp, magıstraldy sý qubyrlarynyń uzyndyǵy 100 shaqyrym, kósheler men úılerge tartylǵan sý qubyrlarynyń uzyndyǵy 98 shaqyrymǵa jetti. Biraq mekeme kúni búginge deıin 2005 jylǵy sýǵa bekitilgen tarıf boıynsha jumys jasaýda. Atap aıtqanda, 1 tekshemetr aýyzsýdyń jetkizilip berý quny 39,43 teńge, qosymsha qun salyǵyn qosa eseptegende 44,16 teńgeni quraıdy. Bul - el boıynsha eń tómengi kórsetkish. Mysaly, bul kórsetkish Qostanaı oblysynda 7 teńgeni quraıdy. Osyǵan baılanysty mekemeniń qarjylyq jaǵdaıy barynsha qıyndaǵan. Túrli uıymdarǵa, onyń ishinde, elektrmen jabdyqtaý kásipornyna qaryz bolǵandyqtan, mekemeniń bankrottyqqa ushyraýy múmkin. Nátıjesinde turǵyndardy aýyzsýmen qamtamasyz etýge qıyndyqtar týyndaýda.
«Sonymen qatar aýdandy sýmen qamtamasyz etetin sý uńǵymalarynyń jumys istep turǵanyna 25 jyldan asyp ketken. Mundaǵy jer asty sý qorlarynyń mólsherin anyqtaý úshin gıdrogeologııalyq izdestirý jumystary 1966, 1976 jáne 1987 jyldary júrgizilgeni belgili bolyp otyr. III-Internatsıonal aýylynyń mańyndaǵy jer asty sý qorlaryn barlaý máselesi 2007 jylǵy Qyzylorda oblysy ákimdigi men QR Aýyl sharýashylyǵy mınıstrliginiń Sý qorlary jónindegi komıtetiniń birlesken otyrysynda qaralǵan. Ókinishke qaraı, bul másele búgingi kúnge deıin oń sheshimin tappaı keledi. Sý qorlaryn izdestirý, ári zertteý úshin qosymsha qarajat kózderi qajet»,- deı kelip, depýtat Úkimet basshysyna: «Osy kórsetilgen máselelerdi jan-jaqty qarap, aýyzsýǵa bólinetin sýbsıdııa mólsherin kóterýge, sý qorlaryn izdestirý, ári zertteý úshin qosymsha qarajat bólinýine yqpal etýińizdi suraımyn»,- dep saýal tastady.
