JOO janynan dıssertatsııalyq keńes qurýdyń talaby ózgerdi
Bilim jáne ǵylym mınıstrliginiń Bilim jáne ǵylym salasyndaǵy baqylaý komıtetiniń tóraıymy Gúlzat Kóbenova dıssertatsııalyq keńes pen dıssertatsııa qorǵaý erejelerine engen ózgerister týraly baıandady.
«Budan bylaı dıssertatsııalyq keńesti ashý kezinde joǵary oqý ornynda tıisti lıtsenzııanyń bolýy jetkiliksiz. Búginge deıin osyndaı talap qana qoıylyp kelgen. Endi JOO-nyń bazasynda bilim berý baǵdarlamalarynyń tizimine engen, saraptamadan ótken, akkredıttelgen PhD baǵdarlamasy bolýy kerek. Sondaı-aq, ol baǵdarlama boıynsha maman daıarlaýǵa jyl saıynǵy memlekettik tapsyrysy bar bolýy tıis», - dedi komıtet basshysy.
Onyń aıtýynsha, qazirgi tańda 80-nen astam JOO-da doktorant daıyndaý lıtsenzııasy bar bolǵanymen, tek 54-inde ǵana dıssertatsııalyq keńes jumys isteıdi. Komıtet tóraıymy jańa norma dıssertatsııalyq keńes neǵurlym daıyndyǵy joǵary JOO-larda ǵana qurylýyna jol ashatynyn aıtady.
«Buǵan deıin dıssertatsııalyq keńes quramy 3 jylǵa taǵaıyndalyp, turaqty negizdi jumys istep keldi. Endi onyń quramy áldeqaıda ıkemdi bolyp, 50 paıyzy turaqty, 50 paıyzy ýaqytsha múshelerge bólinedi. Turaqty múshelerdi JOO-nyń ǵylymı keńesi taǵaıyndaıdy. Al ýaqytsha músheler doktoranttyń qorǵaıtyn taqybyryna sáıkes jeke-jeke taǵaıyndalady. Bul dıssertatsııanyń ádiletti baǵalanýyna múmkindik beredi», - dedi Gúlzat Kóbenova.
Mınıstrlik ókili buǵan deıin doktorlyq dıssertatsııa qorǵaý úshin úmitkerler eńbegin birneshe ret talqylaýdan ótkizip, tipti keıde aqyly negizde talqylaý uıymdastyrýǵa májbúr bolǵanyn eske aldy.
«Doktoranttar dıssertatsııasyn qorǵaý úshin birneshe talqylaý satysynan ótýi kerek bolǵan. Tipti keıde aqyly negizde talqylaýdan ótken jaıttar da bolǵany jasyryn emes. Endi buǵan jol berilmeıdi. Doktorant talqylaýdan kafedranyń keńeıtilgen otyrysynda bir-aq ret ótedi. Dıssertatsııaǵa qatysty pikirlerdiń bári qorǵaý kezinde ǵana aıtylady. Bul doktorantty qorǵaý aldyndaǵy basy artyq júktemeden bosatyp, dıssertatsııalyq keńestiń baǵalaý kezindegi jaýapkershiligin arttyrady», - dedi komıtet basshysy.
Buǵan deıin habarlaǵanymyzdaı, Gúlzat Kóbenova PhD dárejesin qorǵaý kandıdattyq dıssertatsııa deńgeıinde qalyp qoıǵanyn málim etken bolatyn.
