JOO túlekterine memlekettik qyzmetke ornalasýdyń jańa joly ashyldy
ASTANA. KAZINFORM — eQyzmet.gov.kz portalynda joǵary oqý oryndarynyń túlekterine arnalǵan «Túlek» bólimi ashyldy. Onda memlekettik organdardaǵy bos jumys oryndary jarııalanady.
Jańa bólim arqyly túlekter bos laýazymdarmen tanysyp, úmitkerlerge qoıylatyn talaptardy bile alady.
Sonymen qatar 2026 jylǵy 1 shildeden bastap elimizde memlekettik qyzmetke konkýrssyz ornalasý múmkindigi keńeıtildi.
Atap aıtqanda, joǵary jáne joǵary oqý ornynan keıingi bilim berý uıymdaryn bitirgen, ortasha úlgerim kórsetkishi (GPA) keminde 3,33 bolǵan túlekter oqýyn aıaqtaǵannan keıin bir jyl ishinde jekelegen ákimshilik memlekettik laýazymdarǵa konkýrsqa qatyspaı-aq úmitker bola alady.
Ol úshin zańda belgilengen talaptarǵa saı bolýy qajet. Bul múmkindik memlekettik grantpen de, aqyly negizde de bilim alǵan túlekterge beriledi.
Bos jumys oryndary men qyzmetke ornalasý sharttaryn eQyzmet.gov.kz portalyndaǵy «Túlek» bóliminen bilýge bolady.
Memlekettik qyzmet isteri agenttiginiń Qostanaı oblysy boıynsha departamentiniń málimetinshe, túlekterge jumysqa ornalasý tártibi men memlekettik organdardyń kadr qyzmetterimen baılanysý joldary týraly da aqparat beriledi.
Buǵan deıin Qazaqstan Prezıdenti «B» korpýsynyń bos jáne ýaqytsha bos ákimshilik memlekettik laýazymdaryna konkýrs ótkizbeı aýysý tártibine ózgerister engizgen edi.
