JOO túlekterin jumysqa ornalastyrýǵa arnalǵan pılottyq joba iske qosyldy
Pılottyq jobaǵa 6 joǵary oqý orny qatysady. Olar - Pavlodar pedagogıkalyq ýnıversıteti, S.Amanjolov atyndaǵy Shyǵys Qazaqstan ýnıversıteti, D.Serikbaev atyndaǵy Shyǵys Qazaqstan tehnıkalyq ýnıversıteti, Q.I.Sátbaev atyndaǵy Qazaq ulttyq tehnıkalyq zertteý ýnıversıteti, M.Áýezov atyndaǵy Ońtústik Qazaqstan memlekettik ýnıversıteti, S.Ótebaev atyndaǵy Atyraý munaı jáne gaz ýnıversıteti.
«Joba túlekterdi jumyspen qamtý deńgeıin arttyrýdy jáne stýdentterdi odan ári kásibı mansapqa daıyndaýǵa júıeli kózqarasty qamtamasyz etý úshin elimizdegi barlyq joǵary oqý oryndaryn biriktiretin biryńǵaı tsıfrlyq platforma qurýdy maqsat etedi», - dep jazdy vedomstvodan..
Ǵylym jáne joǵary bilim mınıstri Saıasat Nurbektiń aıtýynsha, ýnıversıtetterdiń barlyq derekter bazasyn biriktirý túlekterdiń, bilim berý baǵdarlamalarynyń jáne ýnıversıtetterdiń jalpy kórsetkishteriniń naqty jáne serpindi kórinisin beredi. Sondaı-aq, mınıstrlik bul jobanyń iske qosylýynyń arqasynda bilim berý uıymdaryna júıelik deńgeıde qoldaý kórsete alady.
Osylaısha, «Ulttyq tsıfrlyq mansap ortalyǵyn» qurý Mınıstrlik pen joǵary oqý oryndarynyń «Jańa mamandyqtar atlasy» jobasy boıynsha birlesken jumysynyń qısyndy jalǵasy bolmaq, bul ýnıversıtetterge eńbek naryǵynyń naqty qajettilikterine beıimdelýge múmkindik beredi.
«Biryńǵaı tsıfrlyq platforma jumys berýshilerge daryndy stýdentterdi ózderi tańdaýǵa, al túlekterge tez jumysqa ornalasýǵa múmkindik beredi», - dedi Saıasat Nurbek.
Mınıstr bul jobany linkedin analogy dep ataýǵa bolatynyn, biraq ol qazaqstandyq eńbek naryǵyna beıimdelgenin jáne ýnıversıtetti endi ǵana aıaqtaǵan jas mamandarǵa baǵyttalǵanyn atap ótti.
Kezdesýge qatysýshylar Ulttyq tsıfrlyq mansap ortalyǵyn qurý boıynsha pılottyq joba túlekterdi jumysqa ornalastyrýdaǵy birqatar máselelerdi sheshýge kómektesetinin atap ótti. Joba stýdentterdiń biryńǵaı derekter bazasyn qurýǵa múmkindik beredi Oǵan jumys berýshiler men memlekettik organdar kedergisiz kire alady.
