JOO túlekteri konkýrstyq irikteýsiz memlekettik qyzmetke taǵaıyndala alady

ASTANA. QazAqparat - Elordada «Jas memlekettik qyzmetshiler mektebi» pılottyq jobasy júzege asyrylyp jatyr, dep habarlaıdy QazAqparat qala ákimdiginiń resmı saıtyna silteme jasap.

Astanada ótken onlaın-brıfıng barysynda memlekettik qyzmet salasyndaǵy zańnamaǵa engizilgen ınnovatsııalar jáne basqa da ózekti máseleler aıtyldy.

Máselen, joǵary oqý oryndarynyń túlekteri oqýyn aıaqtaǵannan keıin 1 jyl ishinde aýdandyq jáne aýyldyq deńgeılerde tómengi memlekettik laýazymdarǵa konkýrstyq irikteýsiz taǵaıyndalý múmkindigine ıe. Ol úshin jastar, birinshiden, memlekettik tapsyrys aıasynda joǵary oqý ornyn aıaqtaýy kerek, ekinshiden, GPA nátıjesi 3,33-ten tómen bolmaýy qajet.

«B» korpýsynyń memlekettik ákimshilik laýazymdaryna qoıylatyn biliktilik talaptaryn memlekettik qyzmetke taǵaıyndaý quqyǵy bar laýazymdy adam bekitetin bolady. Bul rette ýákiletti organnyń nemese onyń aýmaqtyq basqarmalarynyń kelisimi alynady.

«Bıyl 1 naýryz ben 31 jeltoqsan aralyǵynda «E-qyzmet» aqparattyq júıesinde memlekettik qyzmetke irikteý boıynsha pılottyq jobany testileý bastaldy. Іlki jobanyń ereksheligi – konkýrs jeńimpazy barlyq kezeńniń qorytyndysy boıynsha arnaıy júıemen avtomatty túrde anyqtalady jáne konkýrstyq komıssııanyń sheshimine táýeldi emes. Daryndy, talantty jáne belsendi jastardy memlekettik qyzmettegi jumysqa tartý maqsatynda «Jas memlekettik qyzmetshiler mektebi» jobasy iske asyp jatyr. Jastar úshin bul joba paıdaly. Onyń arqasynda joǵary oqý oryndarynda oqıtyn jastar memlekettik qyzmet salasyndaǵy paıdaly aqparatty bilip, qyzmettiń jaýapkershilik júktemesin sezine alady», - dep túsindirdi Memlekettik qyzmet isteri agenttiginiń Astana boıynsha departamentiniń basshysy Álı Kómekbaev.