JOO stýdentterinen anonımdi túrde jataqhanalardyń fotolary qabyldanýda
ASTANA. QazAqparat - «Jas Otan» joǵary oqý oryndary jataqhanalarynyń reıtıngin jasamaq. Osy oraıda, stýdentterden jataqhanalardyń shyn beınesin kórsetetin sýretterdi jınaqtap, saýalnamalar ótkizýde, dep habarlaıdy QazAqparat jastar qanatynyń baspasóz qyzmetine silteme jasap.
Osy jyldyń qańtar aıynan bastap «Jas Otan» memlekettik oqý oryndary jataqhanalarynda turatyn stýdentter arasynda áleýmettik saýalnama ótkizýdi bastady. 10 suraqtan turatyn saýalnamamen qatar, WhatsApp jáne Telegram júıelerinde sýretter men hattardy anonımdi túrde qabyldaıtyn senim nómiri ornatyldy.
«Aktsııa bastaý alǵan alǵashqy eki aptada «Jas Otan» jastar qanatynyń aımaqtardaǵy belsendileri «Qazaqstan stýdentteriniń Alıansymen» birlese otyryp, elimizdiń 40 joǵary oqý oryndaryna qarasty 63 jataqhanany aralap, 2173 stýdentten jaýap aldy. Bul jataqhanalarda ár turǵynǵa eseptelgen mınımaldy aýdan kóleminiń erejerlerge saı ekeni anyqtaldy (jataqhana bólmesiniń adam basyna shaqqandaǵy mınımaldy kólemi 6 m2 bolýy shart)», - delingen taratylǵan habarlamada.
Jataqhanalardyń syrtqy aýlasy men ishiniń tazalaný jıiligine baılanysty suraqqa 2173 stýdenttiń 1213-i - «jıi», 800-i «sırek» degen jaýap qaıyrǵan. Al jataqhanalar sapasy boıynsha 1410 adam «jaqsy» degen baǵa berse, 313-i «ortasha» degen. Al qalǵan jaýap berýshiler jataqhanalar sapasyna kóńilderi tolmaıtynyn aıtqan.
Shyǵys Qazaqstan oblysynyń birneshe oqý ornynda sanıtarlyq erejelerdiń buzylý faktileri tirkelgen. Jýyný bólmeleriniń nashar jaǵdaıy, kúrdeli jóndeý jumystarynyń qajettiligi, as bólmeleriniń tazalyq deńgeıiniń tómendigi sekildi máseleler anyqtaldy.
Aktsııany júzege asyrý barysynda kóterilgen mańyzdy máselelerdiń biri - jataqhana jetispeýshiligi. Batys Qazaqstan agrarlyq-tehnıkalyq ýnıversıtetiniń ózinde 370 stýdent jataqhanaǵa muqtaj. Al Ońtústik Qazaqstanda 23 stýdentke jataqhanada oryn tabylmaǵan.
«Uıymdastyrýshylar jataqhanaǵa muqtaj stýdentter sany kórsetilgennen áldeqaıda joǵary ekenine senimdi. Sondyqtan jasotandyqtar jastardan oqý baǵasyna áser etýi múmkindiginen nemese ýnıversıtette túrli kedergilerge tap bolýdan esh qorqynyshsyz saýalnamalarǵa jaýap berýlerin suraıdy. Shara jyl boıy jalǵasyn tabady», - dep atap ótti «Jas Otannan».
