JOO stýdentteri áskerı kafedralarda birinshiden sońǵy kýrsqa deıin oqıtyn bolady
ASTANA. 30 naýryz. QazAqparat - Elordadaǵy «Jas ulan» respýblıkalyq mektebinde joǵary oqý oryndarynyń áskerı kafedralarynda stýdentterdi zapastaǵy ofıtserler baǵdarlamasy boıynsha daıarlaý máselelerine arnalǵan keńeıtilgen májilis ótti,
dep habarlady QR Prezıdenti janyndaǵy Ortalyq kommýnıkatsııalar qyzmeti.
Qorǵanys mınıstriniń birinshi orynbasary - QR QK Bas shtabynyń bastyǵy, general-polkovnık Sáken Jasuzaqov Qarýly Kúshterdi jetildirý boıynsha júrgizilip jatqan úrdisterge keńinen toqtala kelip, sońǵy jyldary áskerı kafedralarda stýdentter daıarlaý júıesi aıtarlyqtaı ózgeriske túspegenin, oqý baǵdarlamalary qazirgi zaman talabyna tolyqtaı jaýap bermeıtinin atap ótti. «Osynyń bári Qazaqstannyń Qarýly Kúshterin damytý maqsatyndaǵy áskerı ónerge oqytylǵan rezervti daıyndaý júıesin túbegeıli ózgertýdi qajet etedi», - dedi S.Jasuzaqov.
Áskerı ónerge oqytylǵan rezervti Qarýly Kúshterdiń talaptaryna saı keltirý úshin, Qazaqstannyń Qorǵanys mınıstrligi Qazaqstannyń JOO-larynyń áskerı kafedralarynda áskerı kadrlardy daıarlaý Tujyrymdamasynyń jobasyn ázirledi.
«Áskerı kadrlardy daıarlaý Tujyrymdamasynda áskerı kafedralarda bilim berý júıesi túbegeıli ózgeriske túsetin bolady. Endi stýdentter birinshi kýrstan bastap, sońǵy kýrsqa deıin áskerı bilim ala alady. Stýdentter oqý mekemesiniń beıinin, áskerı bólimshe polıgondarynyń ornalasý ornyn, óndiristik praktıkany ótkizý nysandaryn esepke ala otyryp qatardaǵy jaýynger kýrsynan bastap, rota komandıri býynyna deıingi laýazymdarǵa kezeń-kezeńmen ótedi dep josparlanýda», - delingen Qorǵanys mınıstrliginiń habarlamasynda.
Sonymen qatar, áskerı kafedralar tek zapastaǵy ofıtserlerdi daıarlaýǵa ǵana emes, Qarýly Kúshterimizdiń materıaldyq-tehnıkalyq qamtý mamandaryna suranysyn qanaǵattandyrýǵa da baǵyttalatyn bolady. Bul óz kezeginde Qorǵanys mınıstrliginiń áskerı oqý oryndarynda komandalyq laýazymdaǵy ofıtserler daıarlaýǵa da tolyq múmkindik beredi.
