JOO rektory: Qıyn sátte halyqtyń muqtajdyǵyn sheshý – birinshi kezektegi másele

ALMATY. QazAqparat – Memleket basshysy Qasym-Jomart Toqaevtyń málimdemesinde aıtylǵan daǵdarysqa qarsy sharalar elimizdegi basty qundylyq – halyqtyń áleýmettik jaǵdaıy ekendigin bildiredi. Abaı atyndaǵy Qazaq ulttyq pedagogıkalyq ýnıversıtetiniń rektory Takır Balyqbaev bólisti, dep habarlaıdy QazAqparat tilshisi.

«Búkil álemge taraǵan koronavırýs pandemııasyna baılanysty Memleket basshysynyń, Úkimettiń qolǵa alǵan aldyn alý sharalarynan bastap, odan keıingi kómek berý sharalarynyń barlyǵy halyqtyń búgingi jaǵdaıyn tolyq túsinýdiń nátıjesi dep bilemin. Ekinshiden, Prezıdenttiń sońǵy úndeýine qatysty aıtar bolsam, ondaǵy eń mańyzdysy, osy áleýmettik jaǵdaıy tómen nemese jumysynan aırylǵan jandardy qoldaýǵa arnalǵan sharalar dep oılaımyn. Bir jaǵynan karantın sharasy el densaýlyǵyna paıdaly bolsa, ekinshi jaǵynan ekonomıkalyq sýbektilerge, ásirese ShOB sýbektilerine áser etip jatyr. Kóptegen adamdar kúndelikti tabysynan aıyryldy. Osy oraıda, birinshiden, zeınetkerlerge, basqa da áleýmettik kómek alatyn tulǵalarǵa 10 paıyzdyq ındeksatsııa búgingi ekonomıkalyq jaǵdaıǵa baılanysty qoldaý bolyp otyr. Odan bólek, Úkimet jumyssyz qalǵan halyqty da umytyp jatqan joq. Osy ýaqytta qyzmetinen aıyrylǵan adamdarǵa berilip jatqan eń tómengi jalaqy mólsherindegi 42 500 teńge kómekti 3 mln jýyq adam alatyn bolsa – úlken kómek. Tipti, basqa jumys tabý týraly jergilikti ákimderge, basshylyq organdarǵa tapsyrma berildi. 85 myńdaı kótermeaqy beriletin boldy. Osynyń barlyǵy qazirgi qıyn halde qalǵan halyqqa kómek dep túsinemin», - dedi Takır Balyqbaev.

Rektordyń aıtýynsha, qazir Qazaq ulttyq pedagogıkalyq ýnıversıtetinde oqytýshylardyń, qyzmetkerlerdiń jumys ornyn saqtap qalý mańyzdy bolyp otyr.

«Endi, bilim salasyna kelsek, aldyn ala aıtylǵan sharalar boıynsha naýryzdyń 16-nan bastap JOO qashyqtan oqý formatyna kóshti. Onyń negizgi ıdeıasy birinshiden, jastarymyzdyń, oqýshylardyń, stýdentterdiń, muǵalimderdiń densaýlyǵyn oılaý. Qazir árkimniń úıinen shyqpaı bilim alýyna tolyq múmkindik bar. Biz sol múmkindikti paıdalanyp otyrmyz. Bizdiń oqý ornynda 10 myńnan astam stýdent, magıstrant, doktorant bar. 2000 qyzmetker pedagog, oqytýshylar úılerinen jumys istep jatyr. Aqyly bólimde oqıtyn stýdentterdiń oqý aqysyn tóleýdi mamyrǵa deıin toqtatyp otyrmyz. Oqý ornynda 2000 jýyq qyzmetker bar. Olardyń jalaqysyn da tóleý kerek. Sol sebepti, jeńildik máselesine kelgende ár stýdenttiń máselesine jeke qaraıtyn bolamyz», - dedi rektor.

foto: matritca.kz