JOO oqytýshylary toltyrýǵa mindettelip kelgen 11 qujat alynyp tastaldy
«Biz QR BǴM buıryqtaryna ózgerister engizip, oqytýshylar toltyratyn qujattar kólemin aıtarlyqtaı qysqarttyq. Tek sońǵy ózgertken bir buıryqtyń negizinde mysal keltireıin. Qatań eseptilik nysandarynan 11 qujat alynyp tastaldy. Olardyń arasynda oqý ýaqytyn aı saıynǵy jáne jyldyq esepke alý vedomostary, bilim alýshylardy aralyq jáne qorytyndy attestattaýǵa arnalǵan birneshe emtıhan vedomostary, qorytyndy attestattaýdy ótkizý jónindegi komıssııa otyrystarynyń ártúrli hattamalary jáne taǵy basqasy bar», - dedi Bilim jáne ǵylym mınıstri.
Ashat Aımaǵambetovtyń aıtýynsha bir ǵana kafedranyń jumys josparyn júrgizý úshin 21 tarmaqtan quralǵan qujatty toltyrý kerek. Al ol kóp ýaqytty qajet etedi.
«Onyń bári mindetti qujattardyń tiziminen qysqartyldy. Degenmen keıbir ýnıversıtetter burynǵy ádetine salyp, eski talaptardan bas tarta almaı keledi. Oqytýshylardan aldaǵy ýaqytta basshylyq sol qujattardy talap etse, QR BǴM-niń buıryqtaryna súıenýine bolady. Jalpy barlyq qujattar tsıfrlyq formatta júrgizilýi qajet», - dep tolyqtyrdy mınıstr.
