JOO oqytýshylaryna 60 myńnan astam ChatGPT lıtsenzııasy berildi
ASTANA. KAZINFORM – 60 myńnan astam oqytýshyǵa ChatGPT lıtsenzııasy berilip, júzdegen JI agentin ázirleý jumysy qolǵa alynǵan. Bul týraly Jibek Joly telearnasynyń «Búgin.LIVE» baǵdarlamasynda QR Ǵylym jáne joǵary bilim mınıstrligi Joǵary bilim berý mazmuny basqarmasynyń basshysy Anargúl Qurmanbaeva joǵary bilim berý júıesindegi jasandy ıntellekt tehnologııalaryn engizý barysy týraly aıtty.
Onyń sózinshe, bul jumys 2024 jyldan beri júrgizilip keledi. Mınıstrlik oqý-ádistemelik birlestiktermen birlesip, joǵary oqý oryndarynda jasandy ıntellektini qoldanýdyń biryńǵaı standartyn ázirlegen.
– Bizdiń negizgi maqsatymyz – stýdentter men oqytýshylardyń mamandyǵyna qaramastan jasandy ıntellektiniń múmkindikterin túsinýine jaǵdaı jasaý. Biz tek tehnologııany paıdalanýdy ǵana emes, synı oılaý qabiletin damytý men etıkalyq mádenıetti qalyptastyrýdy da mańyzdy baǵyt retinde qarastyrdyq, – dedi Anargúl Qurmanbaeva.
Onyń aıtýynsha, bastapqy kezeńde JI boıynsha bazalyq mazmun ázirlenip, keıin árbir joǵary oqý orny ony óz baǵytyna qaraı beıimdegen. Qazirgi tańda ýnıversıtetterde oqytýshylarǵa arnalǵan arnaıy kýrstar turaqty túrde ótkizilip keledi.
– Jasandy ıntellekt óte jyldam damyp jatyr. Sondyqtan oqytýshylardyń bilimin úzdiksiz jetildirý mańyzdy. Osy baǵytta biz OpenAI kompanııasymen yntymaqtastyq ornattyq. Sonyń aıasynda 60 myńnan astam lıtsenzııa bólinip, oqytýshylar ChatGPT quraldaryn bilim berý protsesinde qoldanýdy meńgerip jatyr, – dedi basqarma basshysy.
Onyń aıtýynsha, lıtsenzııalar arqyly oqytýshylar test tapsyrmalaryn ázirleý, praktıkalyq jumystar daıyndaý jáne oqý materıaldaryn júıeleý sııaqty mindetterdi oryndaı alady.
Sonymen qatar elimizde AI Sana ulttyq baǵdarlamasy aıasynda stýdentterge arnalǵan kýrstar uıymdastyrylyp jatyr. Baǵdarlamanyń kelesi kezeńinde qatysýshylar JI agentterin ázirleýge kirisken.
– Qazirgi ýaqytta 308 JI agenti ázirlenip jatyr. Olardyń bir bóligi qazirdiń ózinde qoldanysta Mysaly kásipkerlerge arnalǵan agentter býhgalterlik protsesterdi avtomattandyrýǵa kómektesedi. Al erekshe bilim berý qajettiligi bar azamattarǵa arnaıy ınklıýzıvti jobalar da damyp keledi, – dedi Anargúl Qurmanbaeva.
Aıta keteıik, Qazaqstan 2026 jyly bilim berý júıesi aıasynda ChatGPT Edu platformasyn engizýge kirisken álemdegi alǵashqy elderdiń biri.
