JOO-nyń kitaphanalary qazaq tilindegi 8 jańa oqýlyqpen tolyqty
ALMATY. Mamyrdyń 26-sy. QazAqparat /Ádilet Musahaev/ - Búgin QR Joǵary oqý oryndarynyń qaýymdastyǵy «QazMunaıGaz» Saýda úıiniń demeýshiligimen basylyp shyqqan 8 jańa oqýlyqty Ulttyq kitaphana men 52 joǵary oqý oryndary kitaphanalaryna saltanatty túrde tapsyrdy,
dep habarlaıdy QazAqparat.
Sharany uıymdastyrýshylardyń aıtýynsha, elimizdegi joǵary oqý oryndaryn oqýlyqpen, sapaly ári mazmundy qazaq tilindegi kitaptarmen qamtamasyz etý máselesi ózekti bolyp keledi. Osyndaı olqylyqtyń ornyn toltyrýǵa sál de bolsa óz úlesin qosýdy kózdegen «QazMunaıGaz» Saýda úıi joǵary oqý oryndaryna arnalǵan oqýlyq shyǵarý isine demeýshilik kómek retinde 5 mıllıon teńge bólgen. Nátıjesinde Qazaqstan Respýblıkasy joǵary oqý oryndarynyń qaýymdastyǵynyń baspa ortalyǵy Nabıbýlla Mahmetjanovtyń «Joǵary matematıka esepteriniń jınaǵy», Klara Oljabekova men Birlikbaı Esjanovtyń «Omyrtqalylar zoologııasy» 1-2 tomy, Dáýlethan Smaǵulovtyń «Metallografııa», T.Omarov pen Marýan Tanashevanyń «Beıorganıkalyq hımııa» sııaqty birneshe oqýlyqtar jaryqqa shyqty.
«Barlyq oqý júıelerinde qazaqsha oqýlyqtar jetispeıtindigi barshamyzǵa belgili. Sondyqtan jastardyń qazaqsha bilim alýyn jetildire túsý men olarǵa qazaqsha tárbıe berý úshin óz septigimizdi tıgizdik dep esepteımiz», deıdi «QazMunaıGaz» Saýda úıiniń qarjy jáne ekonomıka bóliminiń bas dırektorynyń orynbasary Aızada Úmbetova.
Sonymen qatar jıyn barysynda kitap avtorlary Ahmet Baıtursynov medalimen marapattaldy.
Sharaǵa ýnıversıtet rektorlary men prorektorlary, kitaphana dırektorlary, kitap avtorlary jáne «QazMunaıGaz» Saýda úıiniń ókilderi qatysty.
