JOO-ny ońtaılandyrý jóninde memlekettik komıssııa quryldy - Rahman Alshanov

NUR-SULTAN. QazAqparat - Elimizdegi munaı, óndiris, metallýrgııa, qurylys, aýyl sharýashylyǵy salalarda 99% Qazaqstandaǵy joǵarý oqý ornyndarynyń túlekteri jumys istep jatyr. Bul týraly QR JOO assotsıatsııalar prezıdenti Rahman Alshanov aıtty, dep habarlaıdy QazAqparat tilshisi.

«Dúnıejúzinde bilim salasyndaǵy báseke damýda. Bul Qazaqstanǵa da yqpal etýde. Qazaqstan sońǵy jyldary bilim sapasy boıynsha dúnıejúzinde 45 eldiń qatarynda. Básekelestikte aldyǵa shyǵý úshin bilim arqyly damý kerek. Elimizde sońǵy jyldary bilim salasyna kóp kómek kórsetilip, bólinetin qarjy mólsheri, grant sany ósip jatyr. Osyǵan baılanysty oqý oryndarynyń derbestiligi ósti», - deıdi Rahman Alshanov Ortalyq kommýnıkatsııalar qyzmetinde ótken brıfıngte.

Ol osyǵan qaramastan bilim salasynda túıindi máseleler bar ekenin aıtty.

«Elimizdegi munaı, óndiris, metallýrgııa, qurylys, aýyl sharýashylyǵy, kólik jasaý, hımııa óndirisi sııaqty eń basty salalarda 99% Qazaqstandaǵy joǵarý oqý ornyndarynyń túlekteri jumys istep jatyr. Degenmen jumysqa ornalasý jaǵynan kórsetkishteri tómen, basqa da talapqa saı emes oqý oryndary bar. Osyndaı jaǵdaılarǵa baılanysty Úkimet basshysynyń orynbasary Berdibek Saparbaevtyń basqarýymen ońtaılandyrý jóninde memlekettik komıssııa quryldy. Men de osy komıssı múshesimin», - deıdi ol.