JOO magıstranttary sportshylarǵa arnalǵan bıokokteıl jasap shyǵardy
PAVLODAR. QazAqparat - Toraıǵyrov atyndaǵy Pavlodar memlekettik ýnıversıtetiniń professory men magıstranttary sportshylarǵa arnalǵan «Altyn sport» bıoónimin jasap shyǵardy, dep habarlaıdy QazAqparat pavlodarnews.kz saıtyna silteme jasap.
«Qazirgi tańda sportshylardyń tamaqtanýy úshin «Aýyl sharýashylyǵy janýarlarynyń súti negizinde arnaıy tamaqtaný úshin fermenttelgen azyq-túlik bıotehnologııasy» taqyrybynda zertteý jumystary júrgizilýde. Mundaı oı ótken jyly paıda bolǵan edi. Bul ónim belgili bir topqa kiretin adamdarǵa arnalǵan. Onyń ishinde balalar men egde jastaǵy adamdar, áskerı qyzmetkerler bar. Budan keıin sporttyq tamaqtaný taqyrybynda ótken jyly zertteý jáne aprobatsııa júrgizdik. P.Stolypın atyndaǵy Omby agrarlyq memlekettik ýnıversıtetimen birge jumys istep, reseılik halyqaralyq patent aldyq. Qazirgi tańda bul ónimge PMÝ-diń atynan patent alý sharalary júrgizilýde. «Altyn sport» degen ataý berildi», - deıdi joba jetekshisi bıotehnologııa kafedrasynyń professory Marına Temerbaeva.
2018 jyldyń qarasha aıynda magıstranttar Altaı ólkesiniń Bıısk qalasynda ótken birinshi Búkilreseılik shyǵarmashylyq jobalar baıqaýyna qatysyp, «Úzdik bıoónim» nomınatsııasynda birinshi oryn jeńip alǵan. Qazirgi tańda Omby qalasynda taǵylymdamadan ótip jatqan magıstrant Gúlnár Janǵulova osy taqyryp boıynsha zertteý júrgizýde.
«Altyn sport» bıokokteıli - ashytylǵan sút ónimi. Onyń quramyna kiretin ıngredıentterdi ázirge aıta almaımyz. Sportshylardyń aǵzasynda jattyǵý kezinde mıkroelementter men dárýmender buzylady. Sondyqtan sportpen aınalysatyndar men sessııa kezinde stýdentter úshin paıdasy zor ári ımmýnıtetti kóteredi. Baıytylǵan jáne arnaıy mıkroflora tańdap alynǵan, aqýyzdarǵa baı. Jańa shyǵarylǵan jáne keptirilgen proteın túrinde qoldanýǵa bolady», - deıdi Marına Temerbaeva.
Professordyń aıtýynsha, sút qospasy aýyl sharýashylyǵy janýarlarynan alynady. Kóbinese kelisimshart boıynsha óńirdegi Ýspen aýdanynyń «Galıtskoe» jáne Sharbaqty aýdanynyń «Pobeda» sharýa qojalyqtaryndaǵy sımmental tuqymdy sıyry men Maı aýdanyndaǵy «Aqjar-Óndiris» agrofırmasynan taýly altaı jáne zaanen eshkileriniń súti qoldanylady.
«Qazaqstanda kóptegen sharýa qojalyqtary eshki sharýashylyǵymen aınalysýdy qolǵa alýda. Búgingi tańda sportshylarǵa arnalǵan taǵam Reseı men Beralýs elinen satyp alynady. Sondyqtan biz naryqta óz ónimimizdi usynýdy kózdep otyrmyz. Jastar jyly aıasynda magıstranttar ári qaraı startap-jobalarǵa qatysady. Bul jobamen Halyqaralyq konferentsııalarǵa qatysyp, Sıngapýr elinde maqala jaryq kórdi», - deıdi professor.
