JOO-lardyń 19 dıssertatsııalyq keńesiniń qyzmeti toqtatyldy - QR BǴM
Qazirgi ýaqytta ýnıversıtetterde taǵy 13 dıssertatsııalyq keńes jabylý aldynda tur.
Qyrkúıekte Bilim jáne ǵylym salasynda sapany qamtamasyz etý komıteti dıssertatsııalyq keńesterdiń jumysyna osy jyldyń naýryz aıynda bekitilgen jańa format boıynsha taldaý júrgizdi.
Tekserý barysynda keıbir joǵary oqý oryndarynyń dıssertatsııalyq keńesteri jumysty uıymdastyrý kezinde buzýshylyqtarǵa jol beretini anyqtaldy.
«Keńester qurylǵan doktorantýranyń keıbir bilim berý baǵdarlamalary akkredıtteýden ótpegen. Birqatar ýnıversıtette keńestiń turaqty quramy bekitilmegen ári keńes quramynda 50% ýaqytsha múshelerdiń bolýy jónindegi talaptar saqtalmaǵan. Birqatar dıssertatsııalyq keńeste resmı retsenzentterdiń, dıssertatsııalyq keńes músheleriniń ǵylymı jumysty baǵalaýy formaldy sıpatqa ıe jáne jumys mazmunyna egjeı-tegjeıli taldaý júrgizilmeıdi», – dep atap ótti QR BǴM Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.
Esterińizge sala keteıik, osy jyldyń naýryz aıynda dıssertatsııalyq keńesterdiń jumys isteýi boıynsha jańa talaptar zańnamalyq túrde belgilendi. Olardyń ishinde dıssertatsııalyq keńesterde ýaqytsha múshelerdiń:
– qorǵalatyn dıssertatsııa taqyryby boıynsha sala mamandarynyń bolýy,
retsenzentterdiń daýys berýge qatysýy jáne olarǵa qatysty shekteýler týraly erejeler bar.
Sondaı-aq keńesterge qorǵaý nátıjeleri boıynsha dıssertatsııalyq jumysty túzetýge nemese qaıta qorǵaýǵa jiberý sııaqty sheshimder qabyldaýǵa múmkindik berildi. Sonymen qatar joo saıtynda qorǵalatyn dıssertatsııalardy merzimsiz ýaqytqa ornalastyrý, jumysty onlaın qorǵaý –engizilgen jańashyldyqtardyń biri bolyp tabylady. Bul sharalardyń barlyǵy sapany qamtamasyz etýge baǵyttalǵan.
