JOO-lardy ońtaılandyrý máselesi talqylandy
ASTANA. 29 naýryz. QazAqparat - QR Bilim jáne ǵylym mınıstrliginde Qazaqstan Respýblıkasynyń joǵary oqý oryndaryn ońtaılandyrý máselesi boıynsha keńeıtilgen májilis ótti,
dep habarlady vedomstvonyń baspasóz qyzmetinen.
1991 jyly elimizde 55 joǵary oqý orny bolatyn. Táýelsizdiktiń alǵashqy onjyldyǵynda jeke sektor qarqyndy damyp, 2001 jyly elimizdegi joǵary oqý oryndarynyń sany 182-ge jetti. Osylaısha, básekelestik orta qalyptasty, al ótpeli ekonomıka jaǵdaıynda joǵary oqý oryndarynda jastardyń kóbeıýi olardyń jumyspen qamtylý máselesin retteýge sep boldy.
Alaıda, búgingi tańda Qazaqstanda joǵary bilimdi mamandardy daıarlaýda olardyń sany men sapasyna qatysty eleýli aıyrmashylyqtar oryn alyp otyr. Damyǵan elderde 1 mıllıon turǵynǵa 1-6 joǵary oqý ornynan kelse, Qazaqstanda 2011 jyly 9 (149 joǵary oqý orny) bolǵan.
Vıtse-mınıstr M.Orynhanovtyń habarlaýynsha, memlekettik baqylaýdyń qorytyndysy boıynsha joǵary bilim berý salasyna oqytýdyń kommertsııalyq nysannyń beleń alýy, aımaqtyq deńgeıde mamandyqtardyń qaıtalanýy men kóbeıýi, syrttaı oqıtyn stýdentterdiń basymdyǵy tán. Kóptegen joǵary oqý oryndarynda stýdentterdiń bilim sapasy tómen, materıaldyq-tehnıkalyq bazasy jáne ǵylymı áleýeti álsiz.
Bilim jáne ǵylym mınıstri B.Jumaǵulov ońtaılandyrýdyń basty maqsaty - myqty jáne básekege qabiletti memlekettik te, jekemenshik te joǵary oqý oryndary teń deńgeıde kórinis tabatyn joǵary oqý oryndar júıesin qalyptastyrý ekenin atap ótti. «Barlyq joǵary oqý oryndary áleýeti myqty kadrlary, zamanaýı oqý-zerthanalyq bazalary jáne ekonomıka suranysyna saı mamandar daıarlaýy qajet. Ońtaılandyrý jeke ǵana emes, memlekettik joǵary oqý oryndaryn da qozǵaıdy. Sondaı-aq, birde bir stýdent ońtaılandyrýdyń saldarynan qıyndyq kórmeýi qajet. Joǵary oqý ornyn jabý kezinde stýdentterdiń quqyqtary men kepildikteri «Bilim týraly» zańda bekitilgen. Bul normalar oryndalady» - dep atap ótti BǴM basshysy.
Qatysýshylar májilistiń qorytyndysy boıynsha Qazaqstan Respýblıkasyndaǵy joǵary oqý oryndaryn ońtaılandyrýdy jalǵastyrý boıynsha naqty usynystar ázirlenýi kerektigi jóninde pikirge keldi.
