JOO-lardy baqylaý sapasyn arttyrý úshin analıtıkalyq platforma qajet – Sergeı Pen

NUR-SULTAN. QazAqparat - QR BǴM bilim berý protsesi sapasyn baqylaýdyń «oılastyrylmaǵan» ádistemesinen málimetterdi júıeli túrde jınaý men taldaýǵa kóshýi tıis. Sondaı-aq joǵary oqý oryndaryn baqylaýdyń sapasyn arttyrý úshin analıtıkalyq platforma qajet. Bul týraly elordada ótken Akademııalyq adaldyq lıgasynyń jalpy jınalysynda Sergeı Pen málimdedi.

Jıynǵa qatysýshylar ýnıversıtetterdiń sessııa nátıjeleri men atalǵan qaýymdastyqtyń joǵary jáne joǵary oqý ornynan keıingi bilim salasynyń damýynda atqaratyn rólin talqylady.

Esterińizge sala keteıik, Akademııalyq adaldyq lıgasy 2018 jyly AQSh-tyń jekemenshik ýnıversıtetteri múshelik etetin tanymal «Lıga Plıýşa - The Ivy League» úlgisi boıynsha qurylǵan bolatyn.

Daýys berý barysynda M.S. Nárikbaev atyndaǵy KAZGıÝÝ Ýnıversıtetiniń Provosty (rektory) Sergeı Pen biraýyzdan 2021-2022 oqý jylyna Akademııalyq adaldyq lıgasy Jalpy jınalysynyń tóraǵasy bolyp saılandy. Jıyn barysynda jańa tóraǵa osy ýaqyt aralyǵynda Lıganyń atqaratyn jumysy boıynsha josparlarymen bólisti.

Sergeı Penniń aıtýynsha, Lıganyń basty maqsattarynyń biri – analıtıkalyq platforma qurý. Bul platforma málimetterdi bir ortalyqtan jınaýǵa jáne Lıgaǵa múshe joǵary oqý oryndarynyń akademııalyq sapa kórsetkishterin qadaǵalaýǵa múmkindik beredi.

«Joǵary oqý oryndarynyń sapasyn baqylaý úshin analıtıkalyq (BI) platformasyn ázirlep, engizý qajet. Ýnıversıtetterdiń oqý júıesinen platformaǵa jarııalaıtyn derekterdiń tizimin anyqtaýymyz qajet. Ol joǵary oqý oryndarynyń qyzyǵýshylyǵyn eskere otyra daıyndalady. Sondaı-aq derbes derekterdiń qorǵalýyn da qamtamasyz etýimiz kerek. Biraz ýaqyttan beri emtıhan formasy boıynsha sessııa nátıjeleri jaıly derekter jınap, taldap jatyrmyz. Endi stýdentterdiń emtıhanǵa qatysýyn, baqylaý emtıhandarynyń ótý merzimin, qorytyndy baǵalary men olardyń ózgerýin taldaıtyn bolamyz», - dep atap ótti Sergeı Pen.

Sondaı-aq Lıga tóraǵasy «Qazaqstan Respýblıkasynyń 2015-2025 jyldarǵa arnalǵan Sybaılas jemqorlyqqa qarsy strategııasyn iske asyrý jónindegi 2021-2023 jyldarǵa arnalǵan is-sharalar josparyn bekitý týraly» Qazaqstan Respýblıkasy Úkimetiniń 2021 jylǵy 24 tamyzdaǵy Qaýlysymen QR barlyq joǵary oqý oryndaryna Akademııalyq adaldyq lıgasynyń qaǵıdattary men taldaý quraldaryn engizý kózdelgenin atap ótti.

«Derekterdi júıeleý jáne biryńǵaı taldaý júıesin qurý bizge ǵana emes, ýákiletti organǵa akademııalyq sapa standarttarynyń ımplementatsııasyn tıimdi baqylaýǵa múmkindik beretini sózsiz. Biz Lıganyń QR Bilim jáne ǵylym mınıstrliginiń sapany baqylaýdyń «oılastyrylmaǵan» ádistemesinen derekterdi júıeli jınaý men taldaý ádisine kóshýine sebepker sýbekt bolǵanyn qalaımyz», - dep qorytyndylady Sergeı Gennadevıch.

Lıganyń Jalpy jınalysyna múshelik etetin 11 joǵary oqý ornynyń ókilderi, qaýymdastyrylǵan músheleri bolyp tabylatyn Qazaqstan Respýblıkasynyń «Atameken» Ulttyq Kásipkerler palatasynyń jáne Qazaqstan Respýblıkasynyń Sybaılas jemqorlyqqa qarsy is-qımyl agenttiginiń ókilderi qatysty.