JOO-lardy qarjylandyrýdyń jańa modeli ázirlenip jatyr

ASTANA. KAZINFORM – Bıyl joǵary oqý oryndarynyń tsıfrlyq ulttyq reıtıngi engiziledi. Bul týraly Senatta ótip jatqan parlamenttik tyńdaýda Ǵylym jáne joǵary bilim mınıstri Saıasat Nurbek aıtty.

- Maqsut Narikbayev University janyndaǵy «Quqyq» baǵyty boıynsha oqý-ádistemelik birlestigimen birge Zań bilimin damytýdyń arnaıy úlken tujyrymdamasy ázirlendi. 7 úlken baǵyty bar qujat daıyndaldy. Komıtettiń (Senattyń Konstıtýtsııalyq zańnama, sot júıesi jáne quqyq qorǵaý organdary komıteti) byltyrǵy usynystary osy tujyrymdamada eskerilgen, naqty sharalar kózdelgen. Mınıstrlik 2024 jyly múddeli memlekettik organdarmen kelisilgen Zań bilimin damytý jónindegi jol kartasyn bekitti, - dedi Saıasat Nurbek.

Onyń atap ótýinshe, mınıstrlik búginde joǵary bilimniń sapasyn arttyrý, joǵary oqý oryndarynyń sapaly bilim berýdegi jaýapkershiligin arttyrý jáne joǵary sapany qamtamasyz etetin ýnıversıtetterdi qoldaý maqsatynda qarjylandyrýdyń jańa modelin ázirlep jatyr.

Sapany qamtamasyz etýdiń tıimdi tetikteriniń biri retinde – joǵary oqý oryndarynyń tsıfrlyq ulttyq reıtıngi ázirlenedi. Elimizdegi barlyq 121 joǵary oqý orny atalǵan reıtıngke kiredi. 

Reıtıng ádisnamasy halyqaralyq akademııalyq reıtıngterdiń negizinde jasaldy. 

- Osy reıtıngtiń arqasynda memlekettik tapsyrystyń da formaty ózgeredi. Birden bastamaımyz. Reıtıng bıyl engiziledi, - dedi mınıstr.

Aıta keteıik, Senatta ótip jatqan sot jáne quqyq qorǵaý júıeleriniń, sondaı-aq normashyǵarmashylyq qyzmettiń sapasyn arttyrý maqsatynda memlekettik organdardyń zań qyzmetteriniń kadrlyq áleýetin nyǵaıtý aıasynda zań bilimin damytý máseleleri boıynsha parlamenttik tyńdaý barysynda palata tóraǵasy Máýlen Áshimbaev zań salasyndaǵy mamandardyń sany bar da sapasy joq ekenin aıtqan bolatyn.

Al búginde olardyń 97 paıyzy aqyly negizde bilim alyp jatyr.