JOO-larda keıbir mamandyqtar jabylady - mınıstr Saǵadıev
ASTANA. QazAqparat - Bıyl joǵary oqý oryndaryna qosymsha 20 myń grant berildi. Osydan baılanysty mınıstrlik joǵary bilimniń sapasyn jiti baqylaıtyn bolady, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, aldaǵy ýaqytta joǵary oqý ornyn bitirgen túlekterdiń jumysqa turý kórsetkishine basa nazar aýdarylady. Atalǵan meje tómen bolsa , sol mamandyqtyń lıtsenzııasy keri qaıtarylady.
«Memleket basshysy buryn-sońdy bolmaǵan sharany qolǵa aldy. Byltyr memlekettik granttardyń sany 10 myńǵa artty. Bıyl taǵy 20 myń grant bólindi. Demek, onymen birge joǵary oqý oryndarynyń jaýapkershiligi artady. Biz bilim sapasyna basa nazar aýdaramyz. Al bul máseleni qalaı qadaǵalaımyz? Birinshiden, jas mamandardyń jumysqa turý reıtıngisi boıynsha árbir joǵary oqý ornynyń jumysyn baǵalaımyz. Eger atalǵan kórsetkish tómen bolsa, onda sol mamandyq boıynsha lıtsenzııany keri qaıtaratyn bolamyz. Bul - basty kórsetkish. Sebebi jumys naryǵynda árbir túlekke suranys bolýy qajet», - dedi E.Saǵadıev Tamyz konferentsııasynyń plenarlyq májilisinde.
Mınıstrdiń aıtýynsha, bıyl respýblıka boıynsha 17 mamandyqtyń lıtsenzııasy keri qaıtaryldy. Osy saladaǵy jumys kúsheıe beredi.
«Sonyń nátıjesinde joǵary oqý oryndary naqty bir salaǵa mamandana bastaıdy. Máselen, bir baǵytta jaqsy maman daıarlasa, sol baǵytpen kete beredi. Al basqa baǵyttarǵa ýaqyt shyǵyndaýdyń qajeti joq. Ekinshiden, joǵary oqý oryndaryna qatysty kásibı talaptar kúsheıedi. Endi, ýnıversıtet, akademııa men ınstıtýt dárejesin berý jumysy qatań baqylanady. Úshinshiden, biz Joǵary oqý oryndary lıgasynyń qurylǵanyn tolyǵymen qoldaımyz. Atalǵan uıym joǵary bilim sapasyn joǵary deńgeıge kóteredi degen senim bar. Budan bólek, rektorlardyń tıimdiligin baǵalaý júıesi, antıplagıat jáne taǵy basqa tetikter bar. Joǵary bilimniń sapasyn qadaǵalaý kezinde biz sonyń bárin qoldanamyz», - dep atap kórsetti E.Saǵadıev.
