JOO-larda kapıtaly 50 mlrd teńge bolatyn 5 endaýment qor qurylady
ASTANA. KAZINFORM — Elimizdegi joǵary oqý oryndarynda budan bylaı stýdentter men oqytýshylarǵa qoldaý kórsetetin endaýment qorlar sany artatyn bolady. Bul týraly Ǵylym jáne joǵary bilim vıtse-mınıstri Gúlzat Kóbenova málim etti.
— Bul bastama Qazaqstannyń álemdegi tabysty ǵylymy bar elderde qabyldanǵan ǵylymnyń jańa ashyq modeline kóshýine baılanysty. Endaýment qorlary ýnıversıtetterge ǵylymı zertteýler júrgizýge jáne Ǵylymı-zertteý jáne tájirıbelik-konstrýktorlyq jumystarǵa (ǴZTKJ) jeke ınvestıtsııa tartýǵa qoldaý kórsetýdiń negizgi elementiniń birine aınalýy tıis. Zańdy ázirleý kezinde endaýment-qordyń úzdik tájirıbesi bar elderdiń tájirıbesi eskerildi. Eń sáttisi retinde amerıkalyq endaýment qorlarynyń úlgisi negizge alyndy, — dedi vıtse-mınıstr OKQ alańynda.
Sondaı-aq spıker endaýment qorlary týraly jeke zań ne úshin qajet bolǵanyn túsindirdi jáne aldaǵy ýaqytta 5 endaýment-qor qurylatytyn atap ótti.
— Jeke zańnyń qajettiligi endaýment qorlarynyń ekijaqty tabıǵatymen baılanysty — bir jaǵynan qaıyrymdylyq, ekinshi jaǵynan ınvestıtsııalyq qyzmetti biriktirip, ony bir zań aıasynda retteý qajet boldy. Qazaqstanda 22 endaýment qory bar. Olardyń barlyǵy derlik qarapaıym qaıyrymdylyq qorlary retinde jumys isteıdi, ortasha mólsheri 1 mlrd teńgeden tómen. Ǵylym jáne joǵary bilimdi damytý tujyrymdamasyna saı, 2029 jylǵa deıin 5 pılottyq endaýment-qor qurý josparlanyp otyr. Olardyń kapıtaly 50 mlrd teńge shamasynda bolady. Osyǵan baılanysty 5 pılottyq endaýment-qordyń tizimi men maqsatty baǵytyn aıqyndap alý qajet, — deıdi Gúlzat Kóbenova.
Endaýment qorlary týraly jeke zańdy ázirleý bastamasyn Memleket basshysy Qasym-Jomart Toqaev 2022 jylǵy Qazaqstan halqyna Joldaýynda kótergen. Keıin 2023 jylǵy sáýirde Ǵylym jáne tehnologııalar jónindegi Ulttyq keńestiń birinshi otyrysynda ýnıversıtettiń turaqty ekojúıesiniń bóligi retinde endaýment qorlary qajet ekenin atap ótti.
Al 2025 jylǵy 30 maýsymda Memleket basshysy «Nysanaly kapıtal qorlary jáne endaýment qorlar (nysanaly kapıtal) týraly» zańǵa qol qoıdy.
Aıta keteıik, buǵan deıin Ǵylym jáne joǵary bilim mınıstri Saıasat Nurbek endaýment qordy separatıstik maqsatqa paıdalanýdyń táýekelderi týraly pikir bildirgen edi.