JOO-larda grant konkýrsyna qujat qabyldaý qashan bastalady
ASTANA. KAZINFORM – Qazaqstanda bilim berý granttaryn taǵaıyndaý konkýrsyna qujat qabyldaý 13-20 shilde aralyǵynda ótedi.
Ǵylym jáne joǵary bilim mınıstrliginiń málimetinshe, talapkerler qujattaryn joǵary oqý oryndarynyń qabyldaý komıssııalary arqyly oflaın jáne vırtýaldy qabyldaý komıssııalary arqyly onlaın formatta, sondaı-aq eGov portaly arqyly tapsyra alady.
Grant konkýrsyna qatysý úshin jeke kýálik, UBT sertıfıkaty, 3h4 kólemindegi fotosýret, orta bilim týraly attestat nemese kolledj túlekteri úshin dıplom qajet.
Sondaı-aq jeńildetilgen sanat boıynsha konkýrsqa qatysatyn talapkerler rastaıtyn qujattaryn usynýy tıis.
«Qujattardy qabyldaý 13-20 shilde aralyǵynda júrgiziledi. Talapkerler qujattaryn joǵary oqý oryndarynyń qabyldaý komıssııalary arqyly nemese eGov portaly arqyly onlaın tapsyra alady. B167 "Ushý apparattaryn jáne qozǵaltqyshtardy ushyryp paıdalaný" bilim berý baǵdarlamasyna túsýshiler úshin dárigerlik ushý-saraptamalyq komıssııasynyń medıtsınalyq kýálandyrý qorytyndysy talap etiledi», – dep habarlady Ǵylym jáne joǵary bilim mınıstrligi.
Mınıstrlik ókilderi qosymsha aqparat alý úshin talapkerlerge joǵary oqý oryndarynyń qabyldaý komıssııalaryna júginýge keńes beredi.
Aıta keteıik, buǵan deıin shyǵarmashylyq emtıhanǵa qujat qabyldaý qashan bastalatyny habarlandy.
