JOO-lar men kolledjderdiń bilim baǵdarlamalaryn úılestirýge erekshe nazar aýdarylady - mınıstr
ASTANA. KAZINFORM – 60 myńnan astam mektep oqýshysy edunavigator.kz platformasy negizinde kásibı dıagnostıkadan ótti. Bul týraly Úkimet otyrysynda Ǵylym jáne joǵary bilim mınıstri Saıasat Nurbek málim etti.
«Ǵylym jáne joǵary bilim mınıstrligi Oqý-aǵartý mınıstrligimen birlesip, suranysqa ıe mamandardy daıarlaý salasynda tıimdi ózara is-qımyl ornatý boıynsha jumys atqaryp jatyr. Memleket basshysy óz Joldaýynda atap ótkendeı, aldymen sý resýrstary, qurylys, energetıka jáne basqa da salalardaǵy mamandardyń jetispeýshiligin joıyp, osy baǵyttar boıynsha bolashaq mamandardy daıarlaýdy qolǵa alý qajet. Atalǵan jumys kelesi baǵyttar boıynsha júrgiziledi. Birinshiden, jumys berýshilermen ózara is-qımyl arqyly olardyń talaptary men suranystaryna sáıkes mamandarǵa qajettilikti anyqtaý, daıarlaý protsesin boljaý jáne josparlaý. Ekinshiden, akademııalyq artyqshylyq modeli negizinde ýnıversıtetter kolledjdermen birigip, maman daıarlaý úlgisine kóshýi eskerilgen. Úshinshiden, úzdik halyqaralyq tájirıbeler men tehnologııalar negizinde bilim berý baǵdarlamalaryn úılestirý», - dedi S. Nurbek.
Onyń aıtýynsha, birinshi baǵyt boıynsha kadrlardy daıarlaý men ınnovatsııalardy damytýdyń basym baǵyttary «Mamandyǵym – bolashaǵym» jobasy sheńberinde óńirlik erekshelikterdi eskere otyryp aıqyndalady. Bul joba eńbek naryǵyndaǵy ózgeristerdi baqylaýǵa, boljaýǵa jáne olarǵa jedel áreket etýge múmkindik beredi. 2021 jyldan bastap bilim berý júıesin kadrlardy daıarlaýdyń ozyq modeline qaıta formattaý maqsatynda Qazaqstannyń jańa kásipteri men quzyretteriniń atlasy ázirlendi. Búginde atlas Eńbek resýrstaryn boljaýdyń ulttyq júıesiniń mańyzdy quramdas bóligine aınaldy. Jańa kásipter atlasy orta mektepter, kolledjder jáne joǵary oqý oryndary úshin kásibı baǵdarlaýdyń negizi bolyp qana qoımaı, sonymen qatar jańa kásiptik standarttar men oqý baǵdarlamalaryn ázirleýge arnalǵan platformaǵa aınaldy.
«5 óńirde (Pavlodar, Mańǵystaý, Qaraǵandy oblystary, Astana jáne Almaty qalalary) Óńirlik kásip atlastary ázirlendi. Olarda 268 jańa mamandyq aıqyndaldy. 60 myńnan astam mektep oqýshysy edunavigator.kz platformasy negizinde kásibı dıagnostıkadan ótti. 66 joǵary oqý orny men kolledjderde Jańa Kásipter Atlasy negizinde 211 bilim berý baǵdarlamasy engizildi. Jergilikti joǵary oqý oryndarynyń bazasynda jumys berýshilerdiń saýalnamalaryna súıene otyryp, Kásipter atlasy negizinde joǵary oqý oryndary men kolledjder úshin kadrlar daıarlaýdyń óńirlik kartalary men jańa baǵdarlamalaryn ázirleýmen aınalysatyn quzyrettilik ortalyqtary quryldy. Kadrlardy daıarlaý máselelerinde jumys berýshilermen ózara is-qımyldyń mundaı modeli ótken jyly qabyldanǵan «Kásiptik biliktilik týraly» jańa zańda bekitilgen. Pavlodar oblysy óńirlik atlasty alǵashqylardyń biri bolyp engizdi. Atlasty engizý aıasynda óńirdiń 20 kásiporny men 15 pılottyq kolledjdiń ózara is-qımyly júzege asyryldy. Nátıjesinde, 40 perspektıvti mamandyq boıynsha 25 jańa oqý baǵdarlamasy ázirlendi», - dedi S. Nurbek.
Mınıstrlik málimetine qaraǵanda, «Mamandyǵym-bolashaǵym» jobasy 5 óńirde iske asyryldy (Pavlodar, Mańǵystaý, Qaraǵandy obl., Astana, Almaty qq.). Bıyldyń aıaǵyna deıin joba taǵy 3 óńirde – Aqtóbe, Jambyl, Almaty oblystarynda júzege asyrylady. 2025 jyldyń sońyna deıin Atyraý, Qostanaı, Túrkistan, Ulytaý, Jetisý oblystarynda iske asyrylatyn bolady. Qalǵan óńirlerde joba ázirlenip jatyr.
«Ǵanı Bektaıuly (Oqý-aǵartý mınıstri) atap ótken árbir makroóńir úshin basym mamandyqtar aıqyndaldy jáne kolledjdermen áriptestikti nyǵaıtý maqsatynda joǵary oqý oryndary bekitildi. Sonymen qatar, jańa «Ǵylym jáne tehnologııalyq saıasat týraly» Zań óńirlik ǵylymdy damytýǵa yqpal etedi, bul kolledj-ýnıversıtet-kásiporyn ekojúıesin qurýǵa múmkindik beredi. Qazirdiń ózinde elimizdiń jetekshi 30 joǵary oqý orny aralas bilim berý baǵdarlamalaryn iske asyratyn 100-ge jýyq kolledjben áriptestik ornatty», - dedi Saıasat Nurbek.
Sonymen qatar ol joǵary oqý oryndary men kolledjderdiń bilim berý baǵdarlamalaryn úılestirýge erekshe nazar aýdarylatynyn aıtty.
