JOO-lar «Arys, biz birgemiz!» aktsııasyna qoldaý kórsetýde
«Arys, biz birgemiz!» aktsııasy aıasynda Muhtar Áýezov atyndaǵy Ońtústik Qazaqstan memlekettik ýnıversıteti oqý ornynyń jataqhanalarynan arnaıy oryndar daıyndady. Sonymen qatar ýnıversıtettiń psıholog mamandary azamattarǵa keńes berip, qolushyn sozýda.
«Arysta oryn alǵan búgingi aýyr jaǵdaı barlyǵymyzdyń qabyrǵamyzdy qaıystyryp, arqamyzdy aıazdaı qarydy. Osyndaı qıyndyqta otandastarymyz «bir jaǵadan bas, bir jeńnen qol shyǵaryp», birigip, baýyrlarymyzǵa kómek kórsetip jatqany kóńil qýantady. Bul - qoǵamnyń belsendiligin aıǵaqtaıdy. Azamattyǵymyzdy aıǵaqtaıtyn osynaý ıgilikti isten shet qalmaý maqsatynda ońtústik óńirdegi eń irgeli joǵary oqý orny - M. Áýezov atyndaǵy Ońtústik Qazaqstan memlekettik ýnıversıtetiniń ujymy aýyzbirlik tanytyp, arystyq aǵaıynǵa kómek kórsetýge jumyla kiristi», - dedi ýnıversıtet rektory Darııa Qojamjarova.
Qazaq ulttyq qyzdar pedagogıkalyq ýnıversıtetiniń ujymy da bir kúndik jalaqylaryn Arysta bolǵan jarylystan zardap shekkenderge aýdarady.
«Arysta bolǵan oqıǵaǵa baılanysty zardap shekkenderge kómek qolyn sozý maqsatynda elimizde «Arys, biz birgemiz!» aktsııasy bastalǵan bolatyn. Igilikti shara barysynda mınıstrlik qyzmetkerleri men otandyq joǵary oqý oryndarynyń ujymy azamattyq kórsetip, múmkindiginshe kómek kórsetýde. Azamattyq qoǵamnyń belsendiligin aıǵaqtaıtyn osynaý qaıyrymy mol isten shet qalmaý maqsatynda Qazaq ulttyq qyzdar pedagogıkalyq ýnıversıtetiniń ujymy men qyzmetkerleri bir kúndik jalaqysyn apattan zardap shekken aǵaıynǵa aýdarýdy jón dep tapty», - delingen ýnıversıtet taratqan aqparatta.
Eske sala ketsek, Arystaǵy jarylystan zardap shekkenderge kómek qolyn sozý maqsatynda elimizde «Arys, biz birgemiz» aktsııasy ótip jatyr. Aktsııa aıasynda Mádenıet jáne sport, Eńbek jáne halyqty áleýmettik qorǵaý, Ulttyq ekonomıka mınıstrlikteriniń qyzmetkerleri bir kúndik jalaqysyn, «QazAqparat» HAA ujymy eki kúndik jalaqysyn aýdarmaq. Osy bastamaǵa depýtattar da qosylǵan.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Apat saldarynan eki adam mert boldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.
Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletindigine ýáde berdi.
Jalpy keshegi alasapyran kezde myńdaǵan ata-ana balarynan kóz jazyp qalǵan bolatyn. Qazirgi ýaqytta olardyń barlyǵy da balalarymen qaýyshty, barlyǵy din-aman.
