JOO-ǵa zańsyz túspek bolǵan Ońtústik turǵyndary san soǵyp qaldy
ShYMKENT. QazAqparat - Ońtústik Qazaqstan oblysynda oqýǵa túsirýge ýáde etip, halyqty 5 mln teńgege san qaqtyrǵan alaıaq ustaldy, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, Saryaǵash aýdanynda polıtsııa qyzmetkerlerine turǵyndardan birneshe aryz túsken. Beıtanys adam olardyń balalaryn joǵary oqý ornyna túsirýge ýáde etip, qomaqty aqshalaryn ıemdenip ketken.
Jábirlenýshilerdiń biri ulynyń JOO-da bilim alýyna 700 myń teńge bergenin, sodan beri aqsha alǵan adamnan habar bolmaǵanyn aıtqan.
Jedel-izdestirý sharalaryn júrgizgen tártip saqshylary seziktini qolǵa túsirdi. Ustalǵan jigit jergilikti turǵyn bolyp shyqty. Tergeý barysynda onyń alaıaqtyqtyń 6 faktisine qatysy bary anyqtaldy. Jábirlenýshilerge 5 mln teńge kóleminde shyǵyn keltirilgen.
Qazirgi tańda kúdiktige qatysty Qylmystyq kodekstiń 190-baby «Alaıaqtyq» boıynsha is qozǵalyp, sotqa deıingi tergeý amaldary júrgizilýde.
Foto: www.cfli.com
