JOO dotsenti Meırambek Besbaevqa jaýap berdi
ASTANA. QazAqparat - Baılardyń asta-tók toı-tomalaqtarynan kóp qarjy tabatyn ánshiler shyn daryndy jastarǵa arnalǵan memlekettik bilim granttaryna jarmaspaǵandary jón. Mundaı pikirdi fılologııa ǵylymdarynyń kandıdaty, L.Gýmılev atyndaǵy Eýrazııa ulttyq ýnıversıtetiniń Teleradıo jáne qoǵammen baılanys kafedrasynyń dotsenti Myrzantaı Jaqyp bildirdi, dep habarlaıdy QazAqparat tilshisi.
Aıta keteıik, buǵan deıin «Mádenıettaný» mamandyǵy boıynsha magıstr dıplomyn qorǵaǵan Meırambek Besbaev áleýmettik jelide óz atyna aıtylyp jatqan syndarǵa jaýap bergen bolatyn. Ol QazAqparat agenttiginde «Meırambek Besbaev: Eshkimniń jolyna da, qyzmetine de talasqan emespin» taqyrybymen de shyqty.
Birshama ýaqyttan keıin Meırambek Besbaev óz postynda atap kórsetken Myrzantaı Jaqyp QazAqparatqa pikirin joldap, ony jarııalaýymyzdy ótindi.
«Eshkimniń naqty atyn atap, túsin tústemesem de, qara halyqtyń esebinen ábden baıyp alǵan «ánshi-jýrnalıst-juldyzdar» endi memlekettik bilim granttary arqyly tegin «oqyp», «ánshi-magıstr-doktorlarǵa» aınala bastaǵany týraly áleýmettik jelide jarııalanǵan jazbamdy keıbir azamattar tikeleı ózderiniń attaryna qabyldap, «qyzǵanyp, kóre almaı jatyr», «qýanyshqa ortaqtasa almaıtyn, ishtarlyǵy bar adam» dep meniń atyma biraz aýyr-aýyr sózder jazyp tastaǵan. Ony qalyń kópshilikke taratyp jatyr eken. Biz sııaqty qatardaǵy qaýymdastyrylǵan professordyń bir aýyz sózine osynshalyqty deńgeıde erekshe mán berip, qyzý talqyǵa salyp jatqan kópshilik qaýymǵa sheksiz alǵysymdy bildiremin!», - dep jazady ǵalym.
Onyń paıymynsha, kópshiliktiń aldynda júrgen óner adamdary aǵylshyn nemese basqa da shetel tilderin jetik meńgerip, tipti ǵaryshtyq tehnıka ǵylymdary salasy boıynsha akademık atanyp jatsa da, ózderi biledi. Oǵan eshkimniń de qarsylyǵy joq.
«Eger ánshiler ózderiniń shynaıy bilimderimen sondaı dárejege jetip jatsa, óz basym oǵan tek qana qýanamyn! Alaıda keıbir «telejuldyzdardyń» sahnadaǵy ataqtaryn paıdalanyp, óner salasyna múldem qatysy joq ulttyq joǵary oqý oryndarynyń magıstratýralary men PhD doktorantýralaryna qaraı jappaı lap qoıyp, memlekettik bilim granttary esebinen «oqý bitirip», dıssertatsııalar «qorǵaýǵa» kirisýi jalpy sıpat ala bastaýyn; ulttyq ýnıversıtetterdi basqaratyn keıbir rektorlardyń óz qaramaǵyndaǵy stýdentteri men professor-oqytýshylaryn tyrp etkizbeı, ýysynda qysyp ustap otyryp, kerisinshe, ártúrli «juldyzdardyń» aldynda qurdaı jorǵalap, jas balasha júgirýin óz basym múldem túsine almaımyn! Baılardyń asta-tók toı-tomalaqtarynan kóp qarjy tabatyn ánshiler men «telejuldyzdar» eger akademııalyq jáne ǵylymı ataq-dárejeler alǵysy kelip jatsa, joǵary oqý oryndarynyń magıstratýralary men PhD doktorantýralarynyń aqyly bólimderine ózderiniń jeke aqshalaryn tólep oqyǵany, shyn daryndy jastarǵa arnalǵan memlekettik bilim granttaryna jarmaspaǵandary jón. Toqsan aýyz sózdiń tobyqtaı túıini - osy», - deıdi Myrzantaı Jaqyp.
