JOO bitirgenderdiń kópshiligi sýdıa bolǵysy kelmeıdi - QR Joǵarǵy sot tóraǵasy

ASTANA. QazAqparat - QR Joǵarǵy sot tóraǵasy Jaqyp Asanov Sot tóreligi akademııasyn támamdaǵandardyń sýdıalyqqa barýǵa nıeti joq ekendigin málim etti, dep habarlaıdy QazAqparat.

«Sot akademııasyna qatysty jaǵdaıǵa toqtalsaq, qazir oqý ornyn támamdaǵandardyń kóbisi sýdıalyqqa barǵysy joq. Eki jyl boıy memlekettiń esebinen bilim alady, burynǵy jumys ornynan jaqsy shákirtaqy alady. Biraq oqýdy aıaqtaǵannan keıin, sýdıa bolǵysy kelmeıdi», - dedi J. Asanov Parlament Senatynyń jalpy otyrysynda.

Onyń sózine qaraǵanda, byltyr akademııany 62 magıstrant bitirse, sonyń tórteýi sýdıa bolǵan.

«Sonda eki jyl ýaqyt pen oǵan bólingen qarajat, ótkizilgen taǵylymdama bosqa ketti degendi bildiredi. Osy oraıda tıisti usynysty daıyndadyq. Akademııany támamdaǵandar sýdıalyqqa ótpese, onda konkýrssyz sot apparatyna nemese sýdıalardyń kómekshisi retinde alýǵa jol ashsaq. Sonda bul kadrlar ózimizde qalyp, tájirıbe jınap, keleshekte sýdıa bolýǵa ózin daıyndaıtyn bolady», - dedi Joǵarǵy sot tóraǵasy.

Budan buryn habarlanǵandaı, búgin Parlament Senatynyń jalpy otyrysynda «Qazaqstan Respýblıkasynyń sot júıesi men sýdıalarynyń mártebesi týraly» QR Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq Zańy jáne «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» Zańy qabyldandy.

Zańnyń maqsaty sot júıesin jańǵyrtý, sýdıa kadrlaryn sapaly damytý jáne jańartýǵa negizdelip otyr.

Jaqyp Asanov Qazaqstanda sýdıalardyń deńgeıin baǵalaıtyn arnaıy júıe qurylatynyn túsindirdi.