Jónsiz talas-tartysty keıbir saıasatkerler ishki turaqtylyqty buzý úshin paıdalanady - Prezıdent

AQTAÝ. QazAqparat - Memleket basshysynyń paıymynsha, otanshyldyq qur sózden emes, naqty isten kórinedi. Bul týraly Mańǵystaý oblysy jurtshylyǵymen kezdesýde aıtyldy, dep habarlaıdy QazAqparat.

«Óziniń keleshegine senimdi halyq myqty memleket qura alady. Sol sebepti, men ózimniń árbir sózimde el birligin saqtaý týraly aıtyp otyramyn. Jónsiz talas-tartysty doǵarý qajet. Muny keıbir saıasatkerler ishki turaqtylyqty, bereke-birlikti buzý úshin paıdalanady. Oǵan jol bermeý úshin árbir azamatymyz, eń aldymen, adal eńbek etip, eldiń damýyna óz úlesin qosýy kerek.

Ashyǵyn aıtsaq, qoǵamda ónimdi eńbekten góri saıasat týraly bos áńgimelerge áýes bolǵandar kóbeıip bara jatyr. Bul – durys emes», - dedi Qasym-Jomart Toqaev.

Ol óskeleń urpaqtyń boıyna, eń aldymen, eńbekqorlyq, otanshyldyq, janashyrlyq sııaqty qasıetterdi sińirýimiz kerektigin taǵy eskertti. Sonda ǵana básekege qabiletti ult ári myqty memleket qalyptasady. Sońǵy jyldary elimizde qolǵa alynǵan aýqymdy sharalardyń bári osy maqsatty kózdeıdi.

«Halyqtyń basym kópshiligi biz júzege asyryp jatqan ózgeristerdi qoldaıtynyn kórsetti. Konstıtýtsııalyq reformanyń aıasynda kóptegen qujattar qabyldanyp jatyr. Men birneshe konstıtýtsııalyq zańǵa jarııa túrde qol qoıdym. Onyń bári memlekettigimizdiń tuǵyryn nyǵaıtyp, elimizdiń damýyna tyń serpin beredi. Jumys munymen toqtamaıdy.

Bolashaqta osyndaı mańyzdy qadamdar jasala beredi. El ekonomıkasy halyqtyń múddesi men ıgiligi úshin jumys isteýi qajet. Ádildik ıdeıasy árdaıym Qazaqstannyń memlekettik saıasatynyń ózegi bolýǵa tıis», - dedi Prezıdent.

Qasym-Jomart Kemelulynyń aıtýynsha, á leýmettik ádildiktiń negizi – ýaqyt talabyna saı keletin zańdar, sybaılas jemqorlyqpen jan-jaqty kúres, azamattardyń eńbekqorlyǵy jáne jastardyń ozyq bilimge umtylysy. Memleket osy tujyrymdy júzege asyrý úshin barlyq jaǵdaıdy jasaıdy.