Jońǵar qaqpasynyń 1 paıyz energııasy Qazaqstannyń energııa qajettiligin tolyǵymen óteı alady - M.Eleýsizov

Bul týraly búgin L.Gýmılev atyndaǵy Eýrazııa ulttyq ýnıversıteti stýdentterimen kezdesken QR Prezıdenttigine kandıdat Mels Eleýsizov aıtty.

Suraq-jaýap túrinde ótken kezdesý barysynda elimiz balama energııa kózderi múmkindigin molynan paıdalanýy kerektigin basa aıtqan ol: «Bizde ondaı múmkinshilik óte aýqymdy. Máselen, Jońǵar qaqpasynyń 1 paıyz energııasy Qazaqstannyń energııa qajettiligin tolyǵymen jaba alady. Degenmen biz ony paıdalanyp otyrǵanymyz joq. Elimizde birde-bir jel energııasy stansysy salynbaǵan», - dedi.

Rasynda da 2006 jyly Jońǵar qaqpasy mańynda qýattylyǵy 5 MVt ilki jel elektr stansysynyń qurylysyn bastaý josparlanǵan edi. Alaıda boı kótergen áli de birde-bir stansy joq. Jalpy qysy-jazy toqtaýsyz soǵyp turatyn jel ótiniń qýattylyǵy jaǵynan Jońǵar qaqpasy aldyńǵy oryndardyń birinde tur. Jońǵar qaqpasynan soǵatyn jeldiń jyldyq ortasha jyldamdyǵy 9,68 m/s quraıdy. Al, Almaty oblysyndaǵy Shelek dálizinen soǵatyn jeldiń jyldamdyǵy 7,77 m/sekýndka teń. Sondaı-aq, jeldiń soǵý jyldamdyǵy Aqtaý aılaǵynda 7,83 m/s, Elordanyń mańaıynda - 6,8 m/s, Ereımentaýda 7,79 - m/s, Qarqaralyda - 6,26 m/s, Arqalyqta 6,93 - m/s, OQO Júzimdik aýyly men Atyraýdaǵy Qarabatan temirjol stansysy aýmaǵynda 7,5 m/s quraıdy.