«Jońǵar qaqpasynan» jel elektr stansasyn salý 2014 jyly qolǵa alynýy múmkin
ASTANA. 21 aqpan. QazAqparat - «Jońǵar qaqpasynan» jel stansasyn salý 2014 jyly qolǵa alynýy múmkin. Búgin Parlament Cenatynyń jalpy otyrysynda «Jańartylatyn energııa jónindegi halyqaralyq agenttiktiń (IRENA) Jarǵysyn ratıfıkatsııalaý týraly» qujatty talqylaý barysynda QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev osylaı málim etti.
«Bıylǵy jyly Qazaqstanda jańartylatyn energetıka baǵytyndaǵy perspektıvaly alańnyń biri sanalatyn Ereımentaý jel parkiniń qurylysy bastalatyn bolady. Bul Astanaǵa jaqyn mańda. Ekinshi mańyzdy joba - Shelek dálizi. Onyń qurylysy aǵymdaǵy jyldyń sońyna nemese kelesi jyly qolǵa alynady dep josparlanýda. Sonymen qatar, Jońǵar qaqpasynda jel elektr stansalaryn salý jobasy da bar. Onyń qýaty 20 MgVt-qa boljanady», - dedi Premer-Mınıstrdiń orynbasary.
Á. Isekeshevtiń aıtýynsha, Jońǵar qaqpasyndaǵy jel elektr stansalaryn salý jobasy 2014 jyly qolǵa alynady. Bul rette Ereımentaý jel parki men Shelek dálizindegi jobalarǵa «Samuryq-Energo» AQ ınvestıtsııa quıýǵa ázir. Bıznes-josparlar da daıarlanǵan. «Al Jońǵar qaqpasyndaǵy jobaǵa Áleýmettik kásipkerlik korporatsııalar arqyly jeke kompanııanyń ınvestıtsııasy tartylýy múmkin. Májilistegi zań jobasy qabyldansa, osy jobaǵa ınvestıtsııalyq qyzyǵýshylyqtar da arta túsedi dep oılaımyz», - dedi mınıstr.
