Jońǵar Alataýy ulttyq tabıǵı parkiniń aýmaǵy keńeıtiledi
TALDYQORǴAN. QazAqparat - Almaty oblysyndaǵy Jońǵar Alataýy memlekettik ulttyq tabıǵı parkiniń aýmaǵy 200 myń gektarǵa keńeımek. Qazirdiń ózinde park 360 myń gektarǵa jýyq, dep habarlaıdy QazAqparat.
On jyl buryn ashylǵan ulttyq parkte qazir sútqorektilerdiń - 49, qustyń 170 túri anyqtalǵan. 7 sútqorekti janýar Qazaqstannyń qyzyl kitabyna engen. Olardyń qatarynda qar barysy, Tıan-shan qońyr aıýy, Túrkistan sileýsini bar. Park qyzmetkerleri jýyrda qar barysyn kishi Basqan ózeni aǵatyn shatqaldyń tómengi jaǵynan kórip qalǵan. Osy kishi Basqan kardonynyń ınspektory Kárim Sátbaevtyń aıtýynsha, túz taǵylaryn tek fototuzaqtan ǵana emes, óz kózimen de jıi baqylaıtyn bolyp júr.
«Sútqorektiler baǵyty boıynsha tek qana barys, túrkistan sileýsini ǵana emes, maral, elik, Tıan-shan qońyr aıýy, tas sýsary, taýeshkilerdiń qanshama fototuzaqqa túsken sátteri bar. Olardyń barlyǵy ǵylymı-aqparat monıtorıng bólimi úshin ǵana emes, Jońǵar Alatýy úshin úlken jetistik bolyp sanalady»,- deıdi fototuzaqtardy quratyn parktiń ǵylymı qyzmetkeri Janarbek Moldahan.
Bıyl park qyzmetkerleri týrıstik baǵyttar sanyn 13-ke jetkizgen. Olardyń ishindegi eń tanymaly Jasylkól men Shýmskıı shyńy. Sondaı-aq jańadan «At tapqan» jáne «Jamantas» degen baǵyttar ashyldy.
Park basshysy Marat Qabıevtyń aıtýynsha, bolashaqta erekshe qorǵalatyn aýmaq 200 myń gektarǵa deıin keńeıedi. Bul óz kezeginde parkti mekendeıtin qustar men janýarlar qoryn eselep, ondaǵy ósimdikter álemin saqtap qalýǵa múmkindik bermek.
Foto: kazakhstan.travel
