Jońǵar Alataýynda Qyzyl kitapqa engen aıýlardyń sany artty
TALDYQORǴAN. KAZINFORM — Jońǵar Alataýy memlekettik ulttyq tabıǵı parkinde Qazaqstannyń Qyzyl kitabyna engen Tıan-Shan qońyr aıýynyń popýlıatsııasy óskeni baıqaldy. Mamandardyń málimetinshe, sońǵy tórt jylda bul jyrtqyshtardyń sany 283-ten 299 basqa deıin kóbeıgen.
Park qyzmetkerleriniń aıtýynsha, mundaı oń dınamıka tabıǵat qorǵaý jumystarynyń júıeli júrgizilýi men janýarlar dúnıesine jasalǵan turaqty monıtorıngtiń nátıjesi.
— Inspektorlarymyz kúndelikti baqylaý kúndelikterin júrgizedi, sondaı-aq turaqty túrde esepke alý jumystary uıymdastyrylady. Qazirgi ýaqytta aıýlardyń negizinen taýly-ormandy aımaqtardy mekendeıtinin senimdi túrde aıta alamyz. Biz 2021-2025 jyldar aralyǵyndaǵy kezeńge egjeı-tegjeıli taldaý jasadyq: 2021 jylǵy alǵashqy esepte 283 aıý tirkelse, júıeli qorǵaý sharalarynyń arqasynda 2025 jylǵa qaraı olardyń sany turaqty ósip, 299 basqa jetti, — dedi «Jońǵar Alataýy» MUTP Janýarlar dúnıesin qorǵaý jáne ósimin molaıtý bóliminiń aǵa ınspektory Jánáli Qumarǵalıev.
Jońǵar Alataýy ulttyq parki óziniń baı faýnasymen erekshelenedi. Kópjyldyq baqylaýǵa súıensek, munda qustardyń 170 túri, baýyrymen jorǵalaýshylardyń 8 túri, sútqorektilerdiń 49 túri jáne omyrtqasyzdardyń 700-den astam túri tirshilik etedi. Sonymen qatar, mundaǵy janýarlar áleminiń 26 ókili Qazaqstannyń Qyzyl kitabyna engizilgen.
Mamandar Ortalyq Azııadaǵy eń sırek kezdesetin ári jasyryn jyrtqyshtardyń biri — qar barysynyń popýlıatsııasyn saqtaýǵa erekshe kóńil bólip otyr. Іlbistiń negizgi mekeni — ulttyq parktiń Alakól fılıaly, al Sarqan jáne Lepsi fılıaldarynda bul jyrtqysh áldeqaıda sırek kezdesedi.
Qyzyl kitapqa engen bul ańdy zertteý jáne qorǵaý maqsatynda tabıǵat qorǵaý mekemesiniń qyzmetkerleri aýqymdy ǵylymı jumystar júrgizip jatyr.
— Aýqymdy jumys isteldi — biz parktiń jalpy aýmaǵynyń shamamen 90 paıyzyn qamtydyq. Fototuzaqtar ornatyp, izderdi tirkedik, vızýaldy baqylaý jasadyq. Jalpy alǵanda, memlekettik ınspektorlar ǵylym bóliminiń mamandarymen birlesip 200-den astam ǵylymı ekspedıtsııa ótkizdi. Keshendi zertteýlerdiń qorytyndysy boıynsha park aýmaǵynda turaqty túrde 25-ten 30-ǵa deıin ilbis mekendeıtinin anyqtadyq, — dedi «Jońǵar Alataýy» MUTP Janýarlar dúnıesin qorǵaý jáne ósimin molaıtý bóliminiń basshysy Moldahan Janarbek.
Іlbisten bólek, park aýmaǵynda kezdesetin iri jáne sırek sútqorektilerdiń qatarynda Túrkistan sileýsini, mańul, tas sýsary jáne Tıan-Shan arqary bar.
Qońyr aıýlar sanynyń artýyna baılanysty park qyzmetkerleri týrıster men jergilikti turǵyndarǵa qaýipsizdik sharalaryn qatań saqtaýdy eskertedi. Mamandar taýly aımaqtarǵa jalǵyz barmaýǵa jáne tek gıdterdiń nemese memlekettik ınspektorlardyń súıemeldeýimen shyǵýǵa keńes beredi. Sondaı-aq, demalýshylardan jabaıy janýarlardy tartýy múmkin tamaq qaldyqtaryn qaldyrmaýdy jáne barlyq qoqysty ózderimen birge alyp ketýdi suraıdy.
Eske sala keteıik, buǵan deıin Jońǵar Alataýy memlekettik ulttyq tabıǵı parkiniń aýmaǵynda ornalasqan úıshikke qońyr aıýdyń kirmek bolǵany habarlanǵan edi. Aldyn ala málimet boıynsha, janýardy tamaqtyń ıisi qyzyqtyrǵan.
