Jońǵar Alataýy ulttyq parkinde qar barysy fototuzaqqa túsip qaldy

ASTANA. KAZINFORM — Jońǵar Alataýy memlekettik ulttyq tabıǵı parkiniń aýmaǵynda sırek kezdesetin ári jasyryn ómir saltyn ustanatyn jyrtqysh – qar barysy (ırbıs) fototuzaqqa túsirildi. Bul týraly Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti habarlady.

— Bul biregeı kadrlar josparly ekologııalyq monıtorıng aıasynda alynǵan. Qar barysy Qazaqstan Respýblıkasynyń Qyzyl kitabyna engizilgen jáne joıylyp bara jatqan túrler qataryna jatady. Onyń tabıǵı ortada kórinýi ekojúıeniń turaqty jaǵdaıyn jáne júrgizilip jatqan tabıǵatty qorǵaý sharalarynyń tıimdiligin kórsetedi, — dep jazdy komıtet mamandary.

Eske sala keteıik, buǵan deıin «Kólsaı kólderi» memlekettik ulttyq tabıǵı parki aýmaǵynda jabaıy janýarlardy baqylaý maqsatynda ornatylǵan beınetuzaqtardyń birine QR Qyzyl kitabyna engizilgen qar barysy taǵy da baıqalǵanyn jazǵan edik.

Onyń aldynda Katon-Qaraǵaı ulttyq tabıǵı parkiniń Arshaty ormanshylyǵynda qar barysy fototuzaqqa túsken bolatyn.