Jóndeýden ótken Úrjar áýejaıyna alǵashqy ushaq qondy

ÚRJAR. QazAqparat - Jóndeý jumystary aıaqtalǵan Abaı oblysynyń Úrjar aýylyndaǵy áýejaıǵa búgin alǵashqy ushaq qondy, dep habarlaıdy QazAqparat óńir ákimdiginiń Telegram-daǵy akkaýntyna silteme jasap.

«Qaıta jańǵyrtý jumystary júrgizilgennen keıin Óskemen – Semeı –Úrjar baǵytyndaǵy alǵashqy áýe reısiniń ushaǵy kelip qondy.

Úrjar áýejaıynyń ushyp-qoný jolaǵyn jóndeý 2020 jyly bastalyp, búginde tolyq aıaqtaldy.

Joba «Nurly jol» baǵdarlamasy aıasynda iske asty. Nátıjesinde ushyp-qoný jolaǵynyń uzyndyǵy 600 metrge uzartylyp, 2 100 metrdi qurady. Sonymen qatar perron alańy eki ushaqqa arnalyp úlkeıtildi», - delingen ákimdik málimetinde.

Áýejaıdyń ushyp-qoný jolaǵy «Air Astana», «Scat», «FlyArystan», «Qazaq Air» kompanııalarynyń ushaqtaryn qabyldaýǵa múmkindigi bar.