Jóndeýden ótken Qostanaı áýejaıy barlyq ushaqtar túrin qabyldaı alady
QOSTANAI. QazAqparat – Qostanaı oblysynda ınfraqurylymdy damytý baǵdarlamasy aıasynda 1195 shaqyrym oblystyq, aýdandyq mańyzy bar joldar kúrdeli jóndeýden ótip, 40 jylǵa jýyq jóndelmegen ushyp-qoný jolaǵy qaıta jańartyldy, dep habarlaıdy QazAqparat oblys ákiminiń baspasóz qyzmetine silteme jasap.
Kelesi jyldan bastap Qostanaıda «Nurly jol» baǵdarlamasynyń jańa jobasy iske asyrylady. Ol 2020-2025 jylǵa deıingi aralyqty qamtıdy. Myńdaǵan jumys oryndary ashylyp, barlyq baǵyttar boıynsha keshendi jospar qurylmaq.
«Bıyl kólik ınfraqurylymyn damytýǵa 37 mlrd teńge bólindi. Ósim 12% teń. 2018 jyly 33,3 mlrd teńge bolǵan. Bul myń shaqyrymnan astam avtojoldy qaıta jańartýǵa jáne jóndeýge múmkindik berdi. Atap aıtqanda, oblystyq mańyzy bar joldardyń 41 shaqyrymy qaıta jańartylsa, 33 shaqyrymy kúrdeli jóndeýden ótti. Sonymen qatar respýblıkalyq mańyzy bar joldardyń 49 shaqyrymy qalypqa keldi. Tek oblys ortalyǵynda ǵana joldardy salýǵa, qalpyna keltirýge jáne jóndeýge 7,7 mlrd teńge jumsaldy. Osy jyly uzyndyǵy 114 shaqyrymdy quraıtyn «Rýdnyı-Denısovka» jol ýchaskesinde qurylys jumystary bastaldy. Joba quny – 36 mlrd teńge. Sonymen qatar 40 jyl boıy jóndeý kórmegen ushyp-qoný jolaǵynyń uzyndyǵy 300 metrge, eni 15 metrge ulǵaıdy. Jańartý jumystarynyń nátıjesinde, aerodrom jalpy salmaǵy 200 tonnaǵa deıingi ushaqtardyń barlyq túrin qabyldaýǵa múmkindik aldy», - deıdi oblys ákiminiń baspasóz hatshysy Saıat Júsipov.
Aldaǵy 5 jylda kólik joldaryn kúrdeli jóndeýge qomaqty kólemde qarajat baǵyttalmaq. Uzyndyǵy 2 myń shaqyrymdy quraıtyn joldardy jańartýǵa 20 mlrd teńge qarjy qarastyrylǵan. Infraqurylymdyq jobalar eń áýeli ekonomıkalyq áleýeti joǵary eldi mekenderde júzege asyrylady. Oblys ákiminiń tapsyrmasymen qala, aýdanaralyq joldardyń sapasyn jaqsartýǵa basymdyq beriledi.
