Jóndeý jumystaryn jedel aıaqtaý kerek: mınıstr oqý oryndarynyń jataqhanalaryn tekserdi

ALMATY. QazAqparat - Almaty qalasyna jumys sapary aıasynda Ǵylym jáne joǵary bilim mınıstri Saıasat Nurbek Qazaq ulttyq agrarlyq zertteý ýnıversıtetiniń Ahýaldyq ortalyǵynyń jumysymen tanysyp, oqý ordasynyń ınfraqurylymdar júıesiniń jańa oqý jylyna daıyndyǵyn tekserdi.

Bul týraly QazAqparat QR Ǵylym jáne joǵary bilim mınıstrliginiń baspasóz qyzmetine silteme jasap habarlaıdy.

Baspasóz qyzmetiniń habarlaýynsha, mınıstr sonymen qatar, stýdenttik jataqhanalar men oqý ǵımarattaryn aralap, aldaǵy oqý jylynda bilim alýshylardyń barlyǵyna qajetti jaǵdaı jasaý kerektigin aıtty.

«Ýnıversıtet jataqhanalary stýdentterdi qabyldaýǵa daıyn, jaqsy jumystar atqarylǵan. Óz tarapymnan bilim alýshylardyń barlyǵyn derlik jataqhanamen qamtamasyz etý kerektigin tapsyramyn» - dedi mınıstr.

Kelesi nysan - Qazaq ulttyq qyzdar pedagogıkalyq ýnıversıtetiniń jataqhanalary. Mınıstr bilim ordasynyń medıtsınalyq ortalyǵyn, bilim alýshylardyń demalys oryndar men kompıýterlik zaldaryn aralady.

Óz sózinde Saıasat Nurbek stýdentterdiń jataqhamen qamtamasyz etilýiniń mańyzdylyǵyn atap ótip, ondaǵy júrgizilip jatqan aǵymdaǵy jóndeý jumystaryn tez arada bitýrýdi, qyzdardyń qaýipsiz jáne jaılylyǵy úshin jataqhananyń syrtqy qorshaýyn tolyq qalpyna keltirýdi tapsyrdy.

Narhoz ýnıversıtetiniń jańa oqý jylyna daıyndyǵyn tekserý barysynda prezıdent Mıras Daýlenov mınıstrge bilim ordasynyń arsenalynda 3 jeke jáne 4 seriktes jataqhanasy baryn habarlady. Jataqhananyń ár qabaty ashanamen, kir jýatyn bólmemen, demalys oryndarymen jabdyqtalǵan.

Óz kezeginde mınıstr barlyq muqtaj jandarǵa jataqhana men jeke hosteldardan oryn berýdi tapsyrdy.