Jóndeý jumystary júrgiziletin turǵyn úılerde avtomattandyrylǵan jylý pýnktterin ornatý mindetteledi
Bul týraly búgin selektorlyq rejımdegi Úkimet otyrysynda Qurylys isteri jáne turǵyn úı-kommýnaldyq sharýashylyq agenttiginiń tóraǵasy Serik Nokın málim etti.
Aıta keteıik, bıýdjet esebinen qaıtarymdy negizde turǵyn úı-kommýnaldyq sharýashylyǵyn jańǵyrtý boıynsha baǵdarlama aıasynda 2011 jyly 373 kóp páterli turǵyn úıler jóndeýden ótti. Osy turǵyda jóndeý jumystary úılerdiń qabyrǵalaryn jylytý, shatyrlaryn jańartý, jertóleleri men kireberisterdi jylytyp, tıisti jumystar júrgizýge negizdelgen.
«Qanatqaqty joba rejıminde 14 turǵyn úıde avtomattandyrylǵan jylý pýnktteri jáne jylý energııasyn tutynýdy esepteıtin jabdyqtar ornatyldy», - dedi agenttik basshysy.
Aqtóbe oblysynda 6 úıde, Almaty oblysynda 1 úıde jáne Astana qalasynda 7 úıde osyndaı jabdyqtar ornatylǵan. Osy oraıda ótken jylý berý maýsymy aıaqtalǵannan keıin atalǵan úılerde jóndeý jumysynan keıin jylýdy tutyný boıynsha tólemderge saraptama jasaldy. Máselen, Aqtóbe qalasyndaǵy 1 turǵyn úıde jylý úshin tólem 35 paıyzǵa únemdelgen.
«Osyndaı jaǵdaı atalǵan avtomattandyrylǵan jylý pýnkti men esepteý jabdyqtary ornatylǵan qalǵan úılerde de tirkeldi. Osy arqyly jylý energııasyn tutynýdy tómendetýdiń qanatqaqty jobasyn júzege asyrý aıtarlyqtaı tıimdi kórsetkishterge qol jetkizdi», - dedi S. Nokın.
Atap aıtqanda, Úkimettiń qaýlysy boıynsha bıylǵy 20 sáýirde turǵyn úılerge jóndeý jumystaryn júrgizý kezinde avtomattandyrylǵan jylý pýnkti men esepteý quraldaryn ornatý mindeti boıynsha turǵyn úı kommýnaldyq sharýashylyǵyn jańǵyrtý baǵdarlamasyna túzetýler engizildi. «Bul óz kezeginde tutynýshylar tarapynan energııany tıimdi tutynýdy yntalandyrady», - dep túıindedi agenttik tóraǵasy.
