Jóndelmegen kólik, paıdalanylmaǵan jabdyq: Atyraý medıtsınasynda 17,5 mlrd teńgeniń buzýshylyǵy anyqtaldy

Atyraý oblysy boıynsha tekserý komıssııasy 7 medıtsınalyq uıymnyń 2023–2025 jyldar aralyǵyndaǵy qarjysyna aýdıt júrgizgen. Tekserý 62,6 mlrd teńgeni qamtyǵan. 17,5 mlrd teńge bolatyn buzýshylyq anyqtaldy. Onyń 1,2 mlrd teńgesi qarjylyq buzýshylyqqa, 1,1 mlrd teńgesi tıimsiz josparlaýǵa, 13,7 mlrd teńgesi memleket aktıvterin tıimsiz paıdalanýǵa qatysty. Taǵy 1,4 mlrd teńge yqtımal shyǵyndar men jiberip alǵan paıda retinde kórsetilgen.

Sonymen birge aýdıt nátıjesinde 195 rásimdik jáne 6 júıelik buzýshylyq tirkelgen. Qarjylyq buzýshylyqtardyń bir bóligi óteýge, taǵy bir bóligi qalpyna keltirýge jatqyzylǵan. Aýdıt materıaldary boıynsha 71 materıal ákimshilik is júrgizýge joldanǵan.

Atyraý oblystyq perınataldyq ortalyǵynda jarǵyda kózdelmegen 719 qyzmet kórsetilip, odan 57,3 mln teńge tabys alynǵan. Sondaı-aq 931 myń teńgeniń alty aqyly medıtsınalyq qyzmeti boıynsha sharttar men tólemdi rastaıtyn qujattar rásimdelmegen. Ortalyqta kúrdeli jóndeý kezinde oryndalmaǵan jumysqa 5,5 mln teńge tólengen.

- «B» akýsherlik korpýsyn kúrdeli jóndeý» jobasy boıynsha is júzinde oryndalmaǵan «Qasbetti jerden jáne qurylys aǵashtarynan qolmen ák boıaýynan tazartý» jumysy úshin 5 mln 492 myń teńge kóleminde bıýdjet qarajaty negizsiz tólengen, - dep málimdedi tekserý komıssııasy.

Jeldetý jáne aýa baptaý júıesin kúrdeli jóndeý kezinde aktilerimen rastalmaǵan jumysqa 139,7 mln teńge jumsalǵan. Budan bólek, medıtsınalyq kómek kórsetýge bólingen 79,7 mln teńge shart nysanasyna sáıkes paıdalanylmaǵan. Onyń 62,3 mln teńgesi kúrdeli jóndeýge jatatyn jumysty aǵymdaǵy jóndeý retinde júrgizýge baǵyttalǵan.

Jedel járdem stantsııasynda 32 kólik paıdalanylmaǵan

Medıtsınalyq jedel járdem stantsııasynda janar-jaǵarmaıdy belgilengen normadan artyq esepten shyǵarý saldarynan 23,5 mln teńge negizsiz jumsalǵan. Sonymen qatar biliktilik talaptaryna sáıkes kelmeıtin epıdemıolog pen onyń kómekshisine 16,9 mln teńge eńbekaqy jáne oǵan baılanysty tólemder jasalǵan. Farmatsevtke qoıylatyn talaptarǵa sáıkes kelmeıtin qyzmetkerdiń farmatsevtıkalyq qyzmet atqarǵany da anyqtalǵan. Oǵan 6,1 mln teńge tólengen.

Stantsııada jol-kólik oqıǵasyna ushyraǵan quny 202 mln teńge bolatyn segiz sanıtarııalyq avtokólik jóndelmegen. Al quny 1 mlrd 57,2 mln teńge bolatyn 32 sanıtarııalyq avtokólik jaramsyz kúıde bolyp, paıdalanylmaǵan.

Qyzmettik úıler kásiporyn qarajatyna jóndelgen

Balalar aýrýhanasynda qyzmetkerler paıdalanýyndaǵy úsh turǵyn úıdi kásiporyn qarajaty esebinen jóndeýge 3,2 mln teńge jumsalǵan. Bul qarajatty qyzmetkerlerden óndirip alý sharalary qabyldanbaǵan. Sondaı-aq quny 2 mln teńge bolatyn týrnıket paıdalanylmaǵan.

- Turǵyn úı-jaılardy paıdalaný sharttarynyń talaptaryna sáıkes, jalǵa alýshynyń áreketi nemese qajetti jáne ýaqytyly sharalar qoldanbaýy saldarynan turǵyn úı jaramsyz kúıge keltirilgen jaǵdaıda, ony jalǵa alýshy óz betinshe jáne óz qarajaty esebinen qalpyna keltirýge ne jalǵa berýshige keltirilgen zalaldy belgilengen tártippen óteýge mindetti bolǵan, - dep túsindirdi tekserý komıssııasy.

Ftızıopýlmonologııa ortalyǵynda oryndalmaǵan jumys úshin 1 mln teńge negizsiz tólengen. Onyń 723,8 myń teńgesi bıýdjetke ótelip, 279 myń teńgeniń jumysy naqty oryndalǵan.

Medıtsınalyq jabdyqtar paıdalanylmaı tur

Kardıologııalyq ortalyqta quny 15,4 mln teńge bolatyn 12 medıtsınalyq jabdyqtyń paıdalanylmaǵany anyqtalǵan. Sondaı-aq Perınataldyq jáne Ftızıopýlmonologııa ortalyqtarymen birge dári-dármekke qajettilikti tıisti esepteýlermen negizdemeý saldarynan 2 mlrd 257,7 mln teńge memlekettik aktıvterdiń tıimsiz paıdalanylýyna jol berilgen.

Birneshe medıtsınalyq uıym boıynsha Áleýmettik medıtsınalyq saqtandyrý qorynyń monıtorıngi nátıjesinde anyqtalǵan buzýshylyqtar men shegerimder saldarynan 1 mlrd 353,2 mln teńge kiris alynbaı qalǵan. Bul kórsetkish birneshe uıymǵa ortaq.

Sonymen qatar aýdıt obektilerindegi 10 óndiristik bazada lıtsenzııaǵa tıisti qosymshalar rásimdelmesten medıtsınalyq qyzmet kórsetilgen. Osy qyzmetterdi qarjylandyrýǵa jalpy 6 mlrd 582,4 mln teńge baǵyttalǵan.

Aýdıt barysynda medıtsınalyq uıymdardyń damý josparlary men olardyń oryndalýy týraly esepterge qatysty da kemshilikter anyqtalǵan. Keıbir uıymdarda baıqaý keńesi týraly erejeler men uıymdyq qurylym belgilengen tártippen bekitilmegen. 2025 jyly ulttyq dárilik formýlıarǵa engizilmegen dárilik zattardy satyp alý faktileri anyqtalǵan.

Aýdıt qorytyndysy boıynsha anyqtalǵan buzýshylyqtardy joıý, bıýdjet qarajaty men memlekettik aktıvterdi basqarýdyń tıimdiligin arttyrý, ishki baqylaýdy kúsheıtý jáne medıtsınalyq uıymdardaǵy kadr tapshylyǵyn azaıtý jóninde usynymdar berilgen.

Buǵan deıin Qyzylorda oblysynda balabaqsha esepshisi 21,5 mln teńge jymqyrdy degen kúdikke ilingenin jazǵan edik.