Jóndelgen nysandar jylýsyz qaldyrmaıtynyna kepil beremin – Roman Sklıar
Premer-Mınıstrdiń birinshi orynbasary Roman Sklıar qazaqstandyqtardyń bıyl qysta jylýsyz qalmaıtynyna kepildik berdi, dep habarlaıdy Kazinform.
«Qazaqstandyqtardyń, ásirese, óńirlerdegi turǵyndardyń qystyń qalǵan birneshe aıynda jylýsyz qalmaıtyndaryna kepildik bere alasyz ba?» — dep surady BAQ ókili.
Roman Sklıar bıyl jóndeýden ótken nysandardyń jylý berýinde másele týyndamaıtynyna senimdi ekeni jetkizdi.
«Men oǵan jeke basymmen kepildik bere alamyn. Biz jóndeý júrgizgen nysandar aqaýsyz jumys isteıdi. Mysalǵa, Ekibastuz jylý-energetıkalyq ortalyǵyn alaıyq. Men de BAQ-taǵy málimetterdi oqyp otyramyn. Ne jazatyndaryńyz maǵan da óte qyzyq. Ekibastuzda taǵy bir tragedııa bolǵanyn nemese kommýnaldyq kollaps bolǵanyn jazyp jatty. Jaýapkershilikpen málimdeımin, ondaı eshteńe bolǵan joq. Kúl soryp shyǵaratyn jańa qondyrǵy jumysyn toqtatqan kezde stansada mazýt jetkilikti boldy. Qazandyqtarda sanaýly mınýttyń ishinde qaıta ot jana bastady. Bul qazandyqtar byltyr 35 gıgakallorııa jylý bólse, bıyl jóndeýden keıin 100 gıgakallorııaǵa jetti, ıaǵnı jańa qazandyqtar qosymsha qýat berip otyr», — dedi Úkimet basshysynyń birinshi orynbasary.
Sondaı-aq ol jylý nysandarynyń durys jumys isteýi Úkimettiń ǵana emes, jergilikti ákimdikter men jylý nysandarynyń ıelerine de baılanysty ekenin eske saldy.
«Jylý máselesine birinshi kezekte atalǵan kásiporyn basshylary basymen jaýap beredi. Tipti qylmystyq jaýapkershilik te qarastyrylǵan. Jergilikti ákimdik basshylary da jaýapty. Bul — kommýnaldyq sharýashylyq qyzmetteri jáne basqalar. Jylý jelileri men jylý nysandaryn kúrdeli jóndeýge bólingen qarajattyń qaıda jumsalǵanyn kórip otyrmyz», — dedi Roman Sklıar.
