«Jomart jan» prezıdenttik tósbelgisi alǵash ret tabystaldy - QHA
Saltanatty sharany ashqan QHA Tóraǵasynyń orynbasary Darxan Myńbaı jomarttyqtyń qazaq xalqyna tán qasıet ekenin erekshe atap ótti. 
«Atalǵan qasıet ata-baba zamanynan esh úzilgen emes. Halqymyzdyń basty ulttyq kody da sol. Jalpy, jomarttyq pen jaqsylyq - meıirimdilik pen izgilikten týatyn nárse. Al izgilikten qashanda iz qalady. Qaıyrymdylyq arqyly adamdar bir-birine meıirim túsiredi. Tipti, ımanı bir sóz bar, baı bolý kerek, baı bolǵan kezde basqa adamǵa meıirimi túsedi degen. Demek, naryq zamanynda tabys taýyp jatqan adamdarǵa qyzǵanyshpen emes, olarǵa qurmetpen qaraýǵa tıispiz. Árıne, bul endi qıyn, sanamyzdy áli de ózgertý kerek. Qudaıǵa shúkir, qazir eldiń jaǵdaıy jaman emes. Degenmen, kómekke muqtaj adamdar áli de bar. Sondaılardy nazardan tys qaldyrmaı, bar júregimen jaqsylyq jasap, jomarttyq tanytyp júrgen azamattarǵa sheksiz alǵysymdy aıtqym keledi", - dedi Myńbaı. 
Onyń aıtýynsha, metsenattar respýblıka boıynsha 1 500 is-sharaǵa uıytqy boldy. Atalǵan sharalarǵa 1 mln-ǵa jýyq adam qatysty. "Shynyn aıtý kerek, qaıyrymdy jandar kimge jáne qandaı kómek jasaǵandaryn ashyq aıtqysy kelmeıdi. Degemen, olardyń eńbegin atap ótý kerek. Sol sebepti búgin biz úzdik degen metsenattardy jınap, arnaıy marapat jasaǵandy jón kórdik. Negizi, elimizde ondaı azamattar kóp. Bárin jınaǵanda zalǵa syımaıtyn edi", - dep atap kórsetti Assambleıa Tóraǵasynyń orynbasary.
Búgingi shara barysynda "Qaıyrymdylyq kerýeni" atty respýblıkalyq aktsııanyń qorytyndysy shyǵaryldy. Sonyń nátıjesi boıynsha 19 adamǵa "Jomart jan" prezıdenttik tósbelgisi tabystaldy. Olardyń ishinde kásipkerler, qoǵam qaıratkerleri, etnomádenı birlestikterdiń jetekshileri bar.
