Jomart shahtasyndaǵy apat: komıssııa jumysyn 10 kúnde aıaqtaıdy

ASTANA. KAZINFORM — Úkimet basshysynyń orynbasary Qanat Bozymbaev Ulytaý oblysy Jomart shahtasyndaǵy apatqa qatysty sońǵy málimetpen bólisti.

— Oqıǵa saldarynan 7 adam qaza tapty, 402 adam evakýatsııalandy. Apat ornynda tótenshe jaǵdaılar jedel shtaby qurylyp, keshe úkimettik komıssııa tergep-tekserý jumysyn bastady, aldyn ala boljam boıynsha shahtada tabıǵı gaz jarylǵan. Komıssııa múshelerimen birlesip apat ornyn qarap shyqtym jáne qaza tapqan jumysshylardyń otbasy múshelerimen kezdestik, — dedi Qanat Bozymbaev Úkimet otyrysynda. 

Onyń aıtýynsha, shahtadaǵy apatqa qatysty sotqa deıingi tergeý amaldary bastaldy. Sondaı-aq shahta jumysy ýaqytsha toqtatyldy. 

— Eki arnaıy kishi komıssııa quryldy, onyń biri avarııanyń týyndaý sebebin, ekinshisi qandaı tehnıkalyq qaýipsizdik talaptarynyń buzylǵanyn anyqtaýy tıis. Atalǵan komıssııalar óz jumystaryn 10 kúnniń ishinde aıaqtaýy qajet. Sonymen birge tıisti saraptamalar júrgizý josparlanýda (sot medıtsınalyq, órt-jarylys tehnıkalyq). Memleket basshysynyń tapsyrmasy boıynsha qaza tapqandardyń otbasylaryna qajetti qoldaý sharalary kórsetilip jatyr, — dedi ol.

Tergeý nátıjesi komıssııa jumysy aıaqtalǵan soń usynylady. 

Eske sala ketsek, 17 aqpanda Ulytaý oblysyndaǵy shahtada apat bolyp, 7 adam tótenshe jaǵdaıda qalǵan edi. 

Keıin kabelderdiń úzilýine baılanysty jumysshylarmen baılanys joqtyǵy aıtyldy. 

Shahta astynda qalǵan qalǵan jumysshylardyń barlyǵy mert bolǵany anyqtaldy. 

Memleket basshysy Ulytaý oblysynda kenshilerdiń qaza tabýyna baılanysty kóńil aıtty. 

Aıta keteıik, qaza tapqan kenshilerdiń otbasylaryna járdemaqylar men tólemder taǵaıyndalady.

Sondaı-aq Ulytaý oblysynda shahtanyń opyrylýyna baılanysty úkimettik komıssııa quryldy.