Jomart kenishindegi apat: oqıǵa ornynda úkimettik komıssııa jumys istep jatyr
ASTANA. KAZINFORM — Premer-Mınıstr Oljas Bektenovtiń tapsyrmasy boıynsha Ulytaý oblysyndaǵy tótenshe jaǵdaı ornynda vıtse-premer Qanat Bozymbaevtyń basshylyǵymen úkimettik komıssııa jumys istep jatyr, dep habarlaıdy Úkimettiń baspasóz qyzmeti.
Komıssııa quramynda Ulytaý oblysynyń ákimi Dastan Ryspekov, TJ mınıstri Shyńǵys Árinov, ishki ister mınıstriniń birinshi orynbasary Baýyrjan Álenov, eńbek jáne halyqty áleýmettik qorǵaý birinshi vıtse-mınıstri Aqmádı Sarbasov, densaýlyq saqtaý vıtse-mınıstri Erjan Nurlybaev, ónerkásip jáne qurylys vıtse-mınıstri Iran Sharhan, QR TJM Ónerkásiptik qaýipsizdik komıteti tóraǵasynyń mindetin atqarýshy Rashıd Dýbaev bar.
Oqıǵa ornynda TJ qyzmeti, ІІM jáne Ónerkásiptik qaýipsizdik komıtetiniń shuǵyl tergeý toby, sondaı-aq Eńbek jáne halyqty áleýmettik qorǵaý mınıstrligi men Ónerkásip jáne qurylys mınıstrliginiń qyzmetkerleri jumys istep jatyr.
— Komıssııa músheleri oqıǵa ornynda bolyp, tergeý barysymen tanysty. Qaza tapqandardyń otbasylaryna birinshi kezekte kómek kórsetý jóninde tapsyrma berildi. Ári qaraı Premer-mınıstrdiń orynbasary Shtab otyrysyn ótkizip, qaza tapqandardyń týystarymen kezdesedi, — delingen habarlamada.
Osyǵan deıin Ulytaý oblysyndaǵy shahtada apat bolyp, 7 adam tótenshe jaǵdaıda qalǵany týraly jazdyq. Resmı derekke qaraǵanda, shahtada taý massasy qulaǵan.
«Qazaqmys» korporatsııasynyń habarlaýynsha, aldyn ala málimetke sáıkes korporatsııa kenishterine tán emes tabıǵı gazdyń jarylysy bolǵan.
«Jomart» kenishinde kóz jumǵan jeti jumysshynyń da denesi tabyldy. Tótenshe jaǵdaılar mınıstrligi baspasóz qyzmetiniń habarlaýynsha, jumysshylardyń denesi joǵaryǵa kóterilip, sot-medıtsınalyq saraptama júrgizý úshin polıtsııa qyzmetkerlerine tapsyryldy.
Prezıdent Qasym-Jomart Toqaev «Qazaqmys» korporatsııasynyń Ulytaý oblysyndaǵy kenishinde taý massasynyń qulaýy saldarynan qaza bolǵan jumysshylardyń týǵan-týystary men jaqyndaryna kóńil aıtý jedelhatyn joldady.
Jomart kenishindegi qaıǵyly oqıǵa kezinde qaza tapqandardyń aty-jónderi jarııalandy.